SUPERBALITA CEBU

Espinoza: Pagmata na mo!

Nagpakabana

BAHA. Bahaan na gani ang dakbayan sa Sugbo, ang una nga makit-an nga hinungdan mao ang kanal, nga gamay ra o di ba dili maayo nga pagkatrabaho. Apan dunay lain daghan nga hinungdan sama sa pagkaupaw sa atong kabukiran ug kakuwang sa disiplina sa kadaghanan, sama sa mga tawo nga adto molabay sa ilang basura sa sapa o bisan asa lang.

Ang mga tawo nga wa magpakabana sa atong kalikupan dayon lang komedya nga, “ahh mobaha man lang og dunay uwan o bagyo”, sama balay nga motulo ang uwan sa sulod kay buslot ang atop. Sa panahon sa ting-init hikalimtan man ang problema sa baha. Gani, atong makita nga ang mga trabahador sa kagamhanan manglimpyo man lang sa mga estero ug kanal kon duol na ang panahon sa ting-uwan.

Human niadtong miagi nga grabe nga baha sa dakbayan sa Sugbo, nga mora na og dagat ang dalan Colon ug nalakip ang Gen. Maxilom ave., ang mga opisyal sa dakbayan sa Sugbo sa OBO (Office of the Building Official) naghimo og usa ka pagsusi sa mga dapit nga gibahaan. Ilang nahibaw-an nga dunay 80 ka mga estraktura nga nahimutang sa mga sapa nga nakababag sa dagan sa tubig-uwan.

Hapit ko matuk-an sa akong pagbasa sa taho tungod kay dili na man bag-o ni nga storya. Pila na ka administrasyon ang nangagi sa pangagamhanan sa dakbayan sa Sugbo, mao man lang gihapon ang probleman matag dunay baha. Kanang mga estraktura, nga gitukod ibabaw o kilid sa mga sapa nagpasabot lang nga natulog sa kapihan ang mga opisyal sa ahensya sa dakbayan nga ang trabaho mao ang pagbantay, pagbadlong, ug kiha sa mga tawo o kompaniya nga nakalapas sa mga balaod sama sa mga estraktura nga naa gitukod sa sapa.

Di man ikahibung nga dunay mga negusyante (gawas sa maayo) nga mopahimus sa higayon. Duna say posibilidad sa korapsyon, nga gipiyongan na lang og pirma ang building permit ug occupancy permit tungod kay kaila ang tag-iya o di ba rekomendado og poderoso nga pulitiko bisan kon naa mahimutang ang estraktura sa dapit, sama sa sapa, nga gidili ang pagtukod sa mga estraktura.

Bisan og uwahi na migawas ang National Building Code (PD 1096, Feb 19, 1977), nga maoy naglatid sa mga estraktura kon asa mahimo nga tukoron, apan dunay probisyon ang New Civil Code (RA 386, June 18, 1949) nga naglagda sa setback ug nagdili sa pagtukod sa mga straktura sa kilid o tungod sa sapa.

Naay daghan mga bag-o nga gitukod nga estraktura dinhi sa Sugbo nga nagdungaw sa mga dalan o highway nga wala motuman sa gilagda nga pag-atras gikan sa kilid sa dalan. Ngano man ni? Tungod kay wala magpakabana ang OBO ug Department of Public Works and Highways (DPWH).

Angay nga aksyonan sa Ombudsman aron molihok ning mga opisyal sa ahensya nga wa motuman sa lagda ug responsibilidad sa ilang trabaho.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph