DI NA gyud ikahibung nga mahisgutan ang suliran sa baha kon ting-uwan na. Kay kini nga problema magbalikbalik na man. Ambot pila na kaha ka mga dekada kining mao nga suliran nga wa masulbad. Hinunoa nagkagrabe ang problema. Naa na guy mga memes sa social media nga hastang pasaheroang mga barko naabot na sa dan Colon ug uban pang mga dapit sa Siyudad. Ang uban nag jetski pa.
Unya si Bise Mayor Michael Rama nisugyot nga tagbuon ang mga opisyal sa Department of Public Works and Highways (DPWH) ug ubang mga opisyal sa Siyudad aron hisgutan ang problema sa baha. Maora bag karon pa nang problemaha nga wa mahisgoti ang mga pamaagi aron kini masulbad. Ang problema wa diha sa mga pamaagi, naa sa pagpatuman.
Unya wa diay makahibawo si Rama aning problemaha sa dihang mayor pa siya sud sa duha ka mga termino? Wa diay masanapi sa baha ang mga karsada sa downtown sa Cebu City? Unya sa panahon na sab ni kanhi mayor Tomas Osmeña naa gihapon ang suliran, apan wa gihapon masulbad.
Ang nangaging mga administrasyon nila ni Rama ug Osmeña duna nay kahigayunan sa pagsulbad unta sa baha, apan palpak sila. Unsaon, ang ilang gipanghimo mao ra man ang temporaryong solusyon. Kon sa hilanat pa, paracetamol lang ang gipatumar bisan kon ang sakit grabe na.
Karon, nia ning administrasyon ni Mayor Edgardo Labella nga nangita usab og solusyon nga pang short term samtang wa pa ang pang long term mapatuman. Naa na man ni ang master plan sa pagsulbad sa baha. Ang pagpatuman na lang niini ang kuwang. Gikinahanglan niini ang pundo ug politcal will sa pagpatuman. Maayong ipakita ni Labella nga ang wa mahimo nila ni Rama ug Osmeña kaniadto, iyang mahimo karon.
Baya ni si Rama, maghisgot pa mag tigom. Ang pagpatuman maoy gikinahanglan. Daghan na bitawng mga tigom kaniadto, wa man masulbad kay kuwang sa aksyon.