SUBO kaayo nga palandungon nga bisan pa man sa paningkamot sa lokal nga gobyerno nga gipangulohan ni Davao City Mayor Sara Duterte-Carpio, nahimo na hinuon karon nga numero ang siyudad sa tibuok nasud nga dunay pinakadaghan nga natala nga kaso sa Covid-19 sud lamang sa usa ka adlaw ning bulan sa Oktubre.
Mao kini ang nakapabalaka sa mga Dabawenyo nga basin mahibalik kita sa enhanced communitiy quarantine (ECQ) dinhi sa siyudad, hinungdan nga namahayag ang mayor nga maningkamot siya nga mahangyo ang Inter-Agency Task Force (IATF) Management of Emerging Infectious Diseases ugaling sa mahitabo kini.
"Definitely kung tagaan ta og ECQ or MECQ, we will request for reconsideration. Kung tagaan ta og GCQ that is thing that we will discuss with the Task Force for Covid-19 of the city government of Davao," sulti pa sa mayor atol sa iyang programa dcDR 87.5 FM niadtong Lunes.
Nganong nahitabo nga misaka ang kaso sa COVID-19 sa siyudad sa Davao? Kini tungod kay nalimot na kita sa pag-obserba sa simple lamang nga health protocols sama sa pagsuot og face mask, face shield, paghugas kanunay og kamot ug modistansya sa mga tawo.
Sulti pa sa akong classmate sa hayskol nga tua na sa Laguna nagpuyo nga nakadayeg sila sa atong mayor tungod kay istrikto kini nga nipatuman sa balaod.
Tinuod kini tungod kay mao man kini ang makita nila sa balita sa telebisyon ug social media, apan wa sila nasayud nga daghan kaayo ang masinupakon sa mga hilit nga lugar sa barangay.
Sa akong pagpaniid sa mga barangay, wala gayud natuman ang health protocols tungod kay gipasagdan lamang sila sa pipila ka mga barangay opisyales.
Dihang akong gipangutana ang mga suod nako sa barangay, suma pa nila nga walay pakabana ang ilang mga opisyales sa barangay.
Tungod kay walay nagpatrolya nga mga barangay functionaries, daghan kaayong mga kabataan nga naglatagaw sa ilang lugar nga taas kaayo ang risgo sa pagtakod Covid-19.
Mao sab ni ang hinungdan nga daghan ang kabataan nga nasakpan ni Mayor Inday nga naglatagaw, imbes nag-atiman sa ilang klase pinaagi sa pagbasa sa ilang modyul.
Di na kinahanglan nga ipamonitor pa nato ang mga bata sa mga magtutudlo kung ang mga opisyales sa barangay naghuna-huna og istratehiya sa pagpakusog sa ilang kampanya sa barangay sama pananglit sa pagpasundayag kung unsa ang tinuod nga kahimtang sa nasud tungod sa makamatay nga kagaw, ug mopatuman sa balaod.
Puwera sa mga nagtinarong sa serbisyo, ngano kaha nga luya man ang mga opisyales sa barangay karon? Wa kaha gikulangan sa ilang incentives gikan sa lokal nga kagamhanan?