AMINADO karon ang Department of Education (DepEd) sa Davao Region nga nasayod na sila sa mga naglatagaw nga estudyante bisan pa man og oras sa ilang klase diha sa online.
Una niini, naitok si Davao City Mayor Sara Duterte-Carpio dihang iyang nakita ang mga estudyante nga nag-suroy suroy lamang sa oras sa tingklase.
Sumala ni DepEd spokesperson Jenielito "Dodong" Atillo nga mipaguwa dayon sila og memo direkta sa mga magtutudlo sa rehiyon nga tan-awon ang presensya sa ilang mga estudyante, aron maseguro nga anaa kini sa klase.
"Duna kita'y Oplan Balik Eskwela Monitoring Activity ug una pa man migawas ang findings ni Mayor Inday naglibot nami sa Region 11 ug nakita namo na nga problema," segun ni Atillo nga nahinabi sa 97.1 Halo-Halo Radio sa Davao City kagahapon, Oktubre 27.
Walay lipod-lipod nga mibutyag ni Mayor Sara sa iyang nakita ug mihangyo kini sa DepEd nga trabahuon gayod ang ilang gimbuhaton ug di na hulaton nga ang siyudad pa ang mohimo niini.
"Please do something about your attendance sa klase or modules sa mga estudyante especially during class hours. Ayaw na ninyo i-expect nga kami pa sa City Government ang mag gukod-gukod anang mga bata, nga kanang mga bata supposedly handled by DepEd, their college schools, or universities," ingon ni Mayor Sara sa regular program niini sa dcDR 87.5 FM, Lunes.
Kung nakita na kini sa DepEd nga problema, nganong wala man dayon giaksyona? Nganong naghulat paman nga moabot sa punto nga maitok ang Mayor? Nan, karon kay mibuto naman ang maong problema, molihok na gyod ang mga magtutudlo, madugangan na ang ilang pagpaningkamot alang niini.
Mao man gyod kini ang sagad sakit sa mga Pinoy, di molihok kung walay modukdok. Unta, makita sa hinanaling panahon ang resulta sa ilang mga tahas.