MIDANGOP ug nagpatala sa kapulisan sa Talomo Police Station ang usa ka 30 anyos nga lalaki human sumbaga sa 36 anyos nga iyang silingan alas 3 sa hapon niadtong Sabado didto sa Caparida Compound, Ecoland, Davao City.
Nasayran nga nagtagay og ilimnong makahubog si Roger dihang miagi sa iyang tungod si alyas Bryan, hinungdan nga iya kining gidunolan og baso nga dunay alak.
Wa suma pa dawata ni Bryan kay di kini moinom, hinungdan nga nasuko si Roger ug iya kining giayog sumbag sa liog ug sa baba.
Perteng bun-oga sa liog ug baba ni Bryan nga maoy hinungdan nga natanggal ang usa ka ngipon ug nasamad ang ngabil.
Gipahimangnoan si Bryan sa kapulisan sa Talomo police nga modangop sa barangay aron mapatawag ang suspetsado. (Jeepy P. Compio)