Mga duwa karon
4:00 pm - Blackwater
batok Magnolia
6:45 pm - San Miguel
batok Meralco
PAREHONG sumpayan og suway sa defending champion San Miguel Beermen ug Meralco Bolts ang ilang sunodsunod nga kadaugan sa ilang panagsangka sa main game karong gabii sa 2019-20 Philippine Basketball Association (PBA) Philippine Cup bubble sa AUF Gym sa Angeles City, Pampanga.
Dili ikalimod nga lisod tapakan ang haw-ang nga nabiyaan nila ni JuneMar Fajardo ug Terrence Romeo apan gipakita sa Beermen nga aduna pa sila’y ikabuga sa pagdepensa sa korona.
Sa pagpangulo ni Arwind Santos, ang Beermen gikan sa duha ka sunodsunod nga kadaugan nga nagpasaka sa ilang rekord ngadto sa 3-2.
Ang Bolts aduna sab 3-2 nga rekord ug gikan sab kini sa duha ka sunodsunod nga kadaugan.
Ning higayuna nga ningpatong na sa tungatungang bahin sa elimination round ang mga kombati, hayan mahinungdanon ang tanang mga duwa.
“It’s a mid-conference game that’s very important for both teams. A win keeps you in the top half of the standings,” asoy ni Meralco coach Norman Black.
Taliwala sa iyang pangidaron nga 39, si Santos daw nabalikan sa iyang pagkabatan-on ug nag-average kini’g 18.5 puntos ug 12 rebounds aron pangulohan ang Beermen sa pagtapak sa haw-ang nga nabiyaan nila ni Fajardo ug Romeo, nga pulos nagpaalim sa ilang angol.
Nagtambayayong ang mga beterano sa Beermen nga sila si Mo Tautuaa, Marcio Lassiter, Alex Cabagnot, ug Chris Ross aron abagan si Santos.
“I’m so happy because of the veterans,” batbat ni SMB coach Leo Austria. “They’ve been stepping up in a really big way, but we need to keep consistent performances para makuha namin ang immediate target namin, which is to make the next round.”
Sa premirong duwa, magsangka ang Blackwater Elite (2-3) ug Magnolia Ang Pambansang Manok Hotshots (2-4). (ESL)