HULGA sa coronavirus ang misungog sa nagpadayon nga PBA bubble didto sa Clark Freeport sa Angeles City.
Unang gikataho mao ang usa ka referee nga giingong gisuspetsahan nga adunay Covid-19 disease apan nag-negative kini sa dihang gipahigayonn ang RT-PCR test.
Pipila lang ka adlaw ang migintang, usa na usab ka player ang giingong nagpositibo apan niadtong Lunes napamatud-an nga nag negatibo diay.
Ang nahitabo sa referee way kalahian sa nahitabo sa usa ka player sa Blackwater, apan bisan pa man ug nagnegatibo na, way kompiyansa ang PBA ug sa gihapon ipaubos sila sa isolation period.
Lakip sa i-isolate mao usab ang tibuok puwersa sa Blackwater ug ingon man ang TNT Tropang Giga kay mao may ilang gikaduwa niadtong Huwebes.
Niadtong Lunes, ang TNT-NorthPort match gikanselar usab. Matod ni commissioner Willie Marcial nga kini gihimo isip precautionary measures bisan pa man og giingong false positive ang maong Blackwater player.
Pero, alang kang Department of Health (DOH) undersecretary Maria Rosario Vergeire kinahanglan pa og dugang mga detalye ang tun-an una pa madekalarar nga false positive ang maong mga kaso.
“Hinihingi pa natin iyong details noong laboratory para mapag-aralan ng ating mga eksperto. We cannot leave appropriate conclusion at this time because we have not seen all the details para malaman natin kung false positive ba talaga ‘yan o hindi,” matod ni Vergiere.
So kon mao ni, di pa gyud diay ta ka siguro kon tinuod ba nga way nag positibo sulod sa PBA bubble. Sa ato pa risgo ning pagpadayon sa mga duwa.
Dili kaha angay nga temporaryo lang unang ihunong ang tournament hangtod nga dili pa gyud makapagawas ang DOH sa final results? Mao ni saktong paniguro.
* * *
SABONG TA
Nipagawas na og mga guidelines o lagda ang Department of the Interior and Local Government (DILG) kalabot sa mga health protocols nga ipasunod sa paghibalik sa operations sa sabong o cockfighting sa tibuok nasod.
Pero atong klaruhan ha, nga kining maong mga guidelines alang lang niadtong mga lisensiyadong buwangan nga gihatagan usab og permiso sa ilang tagsatagsa ka mga local government unit (LGU) nga ubos na sa Modified General Community Quarantine (MGCQ).
Kadtong mga tinagotago nga sabong o tari sama sa tigbakay o kanang sabot-sabot lang, sa gihapon, dakupon ug rondahon sa atong mga tinugyanan sa balaod.
Ang mga dapit nga gideklarar pa gihapon nga ubos sa General Community Quarantine (GCQ) dili usab gihapon tugotan nga makapahigayon og sabong o derby.
Sigon sa atong naobserbahan, istrikto kaayo ang mga health and safety protocols nga gipahaom sa DILG ngadto sa mga cockpit arena.
Sama sa malls ug department stores, kinahanglan magsul-ob og mask, face shields ang mosulod sa buwangan.
Obserbahan usab ang physical distancing, dunay temperature check ug disinfection. Butangan usab og washing stations ang sulod sa cockpit arena aron sa matag karon ug unya magamit sa mga sabungero sa pagpanghunaw ug pamutang og alcohol sa kamot.
Limitado usab ang makasulod sa buwangan ug tulo ra ka tawo ang makasaka sa ruwedehan. Sa ato pa, duha ang mobuhi ug usa ang tigkaryo.
Pero ang nakapasagmuyo sa pipila ka mga cockfighting aficionados mao kining pagdili na og siyagit o pagmasiyar. Magsinyasay na lang ang gustong mosugal.
Kanang mga sugarol, kaantigo na kaayo niini, pero naandan na man gud sa kadaghanan ang pagmasyar kay dali ra nga masabtan ug pagkombinsi ilabi na niadtong bag-ohay pa sa sabong ug dili pa kaayo hanas sa sinyas-sinyas.
Hinuon kay limitado ra man ang pasudlon, dili na kaayo kinahanglanon ang pagsiyagit sa pustada o logro kay gamay ra man ang naa sa sulod. (jun.migallen22@gmail.com)