Dear Atty. Joan,
Maayong adlaw kanimo Atty. Joan ug sa mga nagsunod ining matag semana nga lindog.
Usa ako ka inahan nga nahikawan sa kahigayunan nga makauban ang akong mga anak nga nagpangedaron og dose (12), kinse (15) ug dise sais (16) anyos.
Wala na kami nag-uban sa akong bana unom ka tuig na ang milabay human nga wala gayod kami magkasabot. Dako sab ang epekto sa kamatuoran nga wa makauyon ang iyang mga ginikanan kanako. Hinoon, wala pa man mi nagpa-annul sa among kaminyuon.
Tungod kay usa lang ako ka kahera, wala nako madala ang akong mga anak ug nahabilin sa mga kamot sa ilang amahan. Nahibaw-an nako karon nga nibiya na ang ilang amahan sa among panimalay ug miuban og laing babaye. Hapit tuig na nga nga ang inahan sa akong bana maoy gitugyanan niya nga mubantay sa mga bata.
Gisuwayan nako og hangyo ang akong ugangan nga unta ihatag ang kustodiya sa mga bata kanako labaw na nga gibyaan sa akong bana ang mga bata. Wala misugot si mader kay matod pa wala na daw koy katungod sa mga bata human nga nagbulag kami sa iyang anak.
Kinsa may dunay katungod sa kustodiya sa mga bata- ako o ang ilang lola? Unsa may angay nakong buhaton aron makuha nako ang mga bata? Atty. Joan, wala baya koy igong income aron mulaban sa korte.
Nanghinaot ko nga mapadako nako ang mga bata bisan pa man nga dili ako adunahan.
Salamat daan sa imong tambag kanako ug kaloy-an kamo sa kahitas-an.
Imong magtatampo,
Daria
Dear Daria,
Una sa tanan maayong adlaw usab kanimo diha ug salamat sa imong pagsunod niining lindog.
Subay sa imong suwat, ikaw ang dunay katungod sa kustodiya sa mga bata isip inahan. Gilatid sa Family Code of the Philippines nga ang mga ginikanan sama sa amahan ug inahan maoy dunay katungod sa kustodiya sa mga lehitimong bata. Tungod kay nagminyo kamo sa imong pares kaniadto, makonsiderar nga legitimate children ang inyong mga anak.
Kon sa hisgutan sa mga apuhan, duna silay katungod sa kustodiya sa mga bata apan ikaduha lang sila sa mga ginikanan. Mahitabo lang nga duna silay kustodiya sa mga bata kon wala na ang mga ginikanan. Apan sa inyong sitwasyon, dili pa hinog ang katungod sa lola sa mga bata tungod kay anaa pa man ka isip inahan sa mga bata nga dunay abilidad nga muamoma ug mubuhi sa imong mga anak.
Mahimong sugdan nimo ang pagduso sa imong katungod sa barangay labaw na kon nagpuyo kamo sa usa ka barangay lang. Kon dili kini mahusay sa barangay, mahimo kamong mupasaka og kaso sa korte. Mahimo sab kamo nga magpatabang sa Public Attorney’s Office (PAO) nga nahimutang sa Metro Colon Carpark kon dili igo ang inyong kwarta sa pagkiha. Ipakita ngadto sa maong buhatan ang imong Certificate of Indigency gikan sa barangay ug uban pang mga importanteng papeles sama sa birth certificate, blotter ug uban pa.
Daghang salamat Daria sa imong sulat tampo ug hinaot nakahupay ang maong tambag sa naghoot mo karon nga galamhan.
Imong alagad,
Atty. Joan
[Lindog sinuwat ni Atty Joan Saniel-Amit, Executive Director inubanan sa mga abogado sa Children’s Legal Bureau sama nilang Atty. Jenny Cabradilla, Atty. Stephanie Tan ug Atty. King Perez. Mahimo kamo nga mupadangat sa inyong mga suliran o pagsumbong sa kaso sa pagpangabuso pinaagi sa pag-email (clbphilscebu@gmail.com) o pag-send og mensahe sa Facebook Messenger: m.me/ChildrensLegalBureauInc]