ANG 23 sa 80 ka mga barangay sa dakbayan sa Sugbo ang kasamtangang mao pay makadawat sa ‘hazard pay’ human nga ilang nakompleto ang pagduso sa gipangayong dokomento sa Commission on Audit (COA).
Ang City Government mohatag og tag-P250 matag adlaw sa matag kawani sa barangay gikan niadtong sa Marso 28 ngdto na sa Mayo 31, 2020 tungod sa ilang natampo sa pakigbatok sa Covid-19 nga naka-abag sa pagpakunhod sa kaso.
Ang maong mga barangay gilangkuban sa barangay Pahina San Nicolas, Sawang Calero, Sudlon-I, Suba, San Nicolas Proper, Sapangdaku, Inayawan, Kalubihan, Banilad, Bulacao, San Antonio, Pasil, Luz, Tabunan, Capitol Site, Kinasang-an, Sto. Niño, Kalunasan, Hipodromo, Taptap, Tagba-o, Cambinocot, ug Basak San Nicolas.
Base sa guidelines, maximum nga 100 ka mga kawani sa matag barangay ang makadawat sa hazard pay nga mahimong makobra sugod karong Biyernes, Oktubre 30, 2020.
Si Mayor Edgardo Labella nagkanayon nga mapun-an pa ang gidaghanon sa maong mga barangay sa mosunod nga mga adlaw sanglit ang ubang barangay officials nagkumpleto pa sa mga rekisito nga gipangayo sa Commission on Audit.
Ang paghatag og hazard pay sa City Government ubos sa liderato ni Labella nagagumikan sa pagrisgo sa mga barangay officials ug employees sa ilang kinabuhi matabangan ang City Government sa kampaniya batok Covid-19 sukad niadtong buwan sa Marso kansang kaso niabot og kapin 10,000. Kasamtangan anaa sa kapin 200 ang pabilibng aktibo. (PAC)