ADUNAY 1,720 ka mga public utility jeepneys (PUJs) ang tugotan nga makabiyahe sa 18 ka rota sa dakbayan sa Sugbo.
Kini base sa nasabutan sa Task Force nga gihulma ni Cebu City Mayor Edgardo Labella nga gipangulohan ni Konsehal James Cuenco nga miduso og feasibility study ngadto sa mayor.
Si LTFRB 7 Director Eduardo Montealto Jr. sa iyang bahin nipasabot nga ang maong gidaghanon maoy ilang nauyonan sanglit dili pa tanan establisemento ang nag-operate.
Ilabi na nga wala pay face-to-face classes ngadto sa mga tinun-an.
Ang Cebu City adunay 4,000 ka mga aktibo nga PUJ nga kanhi nagdagan sa dihang wa pa gisuspenso ang ilang operasyon resulta sa pandemiya.
Apan gitataw ni Cuenco nga adunay kondisyon ang mga drayber ug operator sa PUJ sa dili pa mobalik sa ilang pamasada, gikinahanglan nga mopa-ubos sa inspeksiyon sa Land Transportation Office (LTO) 7 aron sa pagsuta kon wa kiniy pending violation.
Gikinahanglan sab nga mopaubos sa swab test ug ang pagkuha og examination sa LTO may labot sa lagda sa trapiko.
Gipahibawo ni Cuenco nga kadtong mga rota nga agi-an sa mga PUJ gidili na ang pag-park sa mga sakyanan daplin sa kalsada aron dili makabara sa trapiko.
Samtang si Mayor Labella maningkamot nga makabalik sa ilang panginabuhi-an ang mga PUJ drayber ilabi na nga ang pagpamasada ray gisaligan sa ilang pamilya.
PISTON
Sa laing bahin, gikalipay sa mga miyembro sa Pinagkaisang Samahan ng mga Tsuper at Operators Nationwide (Piston) Cebu nga makabalik na sila og pamasada.
Dakong pasalamat ni Ronilo Gahator, ang vice chairman sa Piston, nga sa liwas Kalag-Kalag aduna nay pipila sa ilang mga miyembro ang makabyahe og balik sa Siyudad sa Sugbo.
Matod niya nga nakigtagbo si Cuenco kanila aron ipahibawo nga aduna ray 1,000 ka mga PUJs ang pabiyahi-on apan karon dakong pasalamat niya nga gipadaghanan pa kini ngadto sa 1,720.
Ang maong kalambuan naghatag og paglaom ngadto sa mga drayber nga di na sila magutman pa.
Matod ni Gahator nga aduna silay 500 ka mga miyembro sa Piston.
Bisan paman nga adunay mga gipangayo nga requirements labi na sa pagpa-ubos sa swab test, wala kini problema kay ang labing importante nga makabyahe na sila pagbalik.
Nanghinaot si Gahator nga libre ang pagkuha sa requirements ilabi na sa swab test tungod kay wala silay igong kwarta nga ikabayad human sa pito ka buwan nga wala silay kita.
Gipanawagan sab sa Piston ang lokal nga kagamhanan sa dakbayan sa Mandaue nga pabalikon na sab og byahe ang pipila ka mga miyembro nila.