SUPERBALITA CEBU

Diputado: Kagubot sa Bohol

Cuentas Claras

NAGUBOT karon ang lalawigan sa Bohol tungod sa pagbiyahe ni Panglao Mayor Nila Montero padung sa Cebu ug balik sa Bohol sobra sa usa ka bulan na ang nakalabay.

Matod pa, milarga si Mayor Montero nga walay clearance to travel gikan sa Bohol IATF og nakalapas kini sa quarantine protocol.

Tungod sa maong panghitabo, nimando si Governor Art Yap (GAY) nga ipa-imbestigar ang maong panghitabo ni Bohol PNP Provincial Commander Joselito Clarito.

Apan daghan ang nahibulong kay human sa matod pa, makuti nga imbestigasyon, nirekomendar man hinuon si Clarito nga ipa-drop ug ipa-close ang maong kaso kay matod pa, nahisubay kuno sa quarantine protocol ang gihimo ni Mayor Montero.

Mismo ang station manager sa dyRD nga si Peter Dejaresco wala makapugong sa pagpagawas sa iyang kahinuklog.

Ngano nga gipa-self quarantine man mi tanan nga miatender adtong meeting nga diha si Montero kon nagtuo pa si GAY nga wala maka-violate si Montero sa protocol?

Mao kini ang pangutana ni Dejaresco. Gusto ni Dejaresco nga ipasabot kini ni GAY sa mga taga-Bohol kay “dako kining insulto sa mga Bol-anon.”

* * *

Usa sa gipakadak-an ni Clarito sa iyang report nga kuno, dunay dakong kalahian ang gilatid sa Bohol IATF kon ikompara sa national IATF.

Angay kuno nga husayon kini sa Bohol IATF aron dili sila maglisod sa PNP-Bohol pagpatuman sa lagda sa protocol.

Apan gisupak kini sa Kapitolyo kay matod pa, wala kunoy kalahian o conflict ang protocol nga gilatid sa Bohol IATF ug sa national IATF.

Mao kini hinungdan nga kaniadtong nakalabay nga Biyernes, sobra sa 6 ka oras nga gituki ang report ni Clarito ug matod pa sa nakakita, giayo-ayo ug batikos si Clarito sa iyang report.

Human sa 6 ka oras, nipagawas og pamahayag si GAY nga gi-reject niya ang report ni Clarito ug usbon kini base sa resulta sa meeting kaniadtong Biyernes.

* * *

Sa akong pagbasa sa report ni Clarito, duna akoy nakita. Matod pa ni Clarito, ni-request og clearance to travel si Mayor Montero sa Kapitolyo apan wala siya isyohi og clearance.

Bisan walay clearance to travel, nipadayon gihapon si Montero sa iyang pag-biyahe padung sa Cebu ug balik sa Bohol.

Kining puntoha pa lang, klaro na kaayo ang kalapasan nga nahimo ni Mayor Nila Montero. Nidason usab niini si Vice Governor Rene Relampagos. Apan dunay laing punto nga migawas.

Matod pa ni Dr. Anthony Damalerio nga naglingkod sa secretariat sa Bohol IATF, wala silay nadawat nga request for clearance to travel gikan ni Mayor Montero. Gani ilang nahibaw-an nga ang request ni Montero didto kuno i-file sa DILG office sa Panglao ug dili sa Kapitolyo.

* * *

Unsay tubag ni Mayor Nila Montero sa mga atake?

Demolition job kining tanan, matod pa niya. Nasayod ang katawhan nga sa milabay nga piniliay, didto siya mo-suporta ni kanhi Maribojoc mayor Toloy Evasco nga maoy mikontra ni GAY sa sambunot sa pagka-gobernador sa Bohol ug si Evasco ang nidaog sa pagka-gobernador didto sa lungsod sa Panglao.

Gibale-wala ni Montero ang mga alegasyon nga nakalapas siya sa quarantine protocol kay ang tanan kuno, pulos pamolitika lang. Walay puas ang mga lain-laing komentaryo sa radyo ug sa social media sa maong isyo.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph