SUPERBALITA CEBU

Editoryal: Babag sa agus sa tubig

Editorial Cartoon by Ariel Itumay

DILI lang walay klaro nga drainage system ang problema sa daling pagbaha o lunop sa dakbayan sa Sugbo o bisan sa tibuok Metro Cebu, apan dunay daghang estruktura o buildings ang gitukod nga nakababag sa agus sa tubig labi na kon magbunok ang uwan.

Kini nga problema kaluha ba sa paspas sa kalamboan sa Sugbo? Dili, apan ang kahinay sa pagpatuman sa katugbang nga inprastratura sa mga lokal nga opisyal kaniadto ug epekto usab sa korapsiyon.

Dili ba karaan na ang balaud nga nagdili sa pagtukod og estraktura ibabaw sa sapa o kanal ug kabalaya sulod sa easement zone? Nganong natukod ang nga lig-ong edipisyo nga nakalapas sa balaud? Klaro nga dunay pagsuborno nga nahitabo. Niabot karon sa punto nga nahimong kining dakong problema .

Si Mayor Edgardo Labella sa dakbayan sa Sugbi nipatawag niadtong Lunes, Oktubre 26, sa mga tagdumala o tag-iya sa dili sa mominos 83 ka mga estruktura nga gitumbok sa Office of the Building Official (OBO).

Gituki sa mayor ang nagkagrabe nga problema sa baha sa dakbayan ug ang solusyon diin kabahin ang mga hingtungdang tag-iya sa mga dagkong edipisyo. Niadtong Oktubre 13, Martes. nahitabo ang grabeng pag-awas sa sapa sa Gen. Maxilom Ave. nga nikalas og 15 anyos nga batang lalake dapit sa White Knight Hotel (kanhi Mango Park Hotel).

Gikataho nga ang mga tag-iya sa maong mga edipisyo ningpadayag sa ilang kooperasyon sa kasulbaran sa baha. Maayong dili lang istorya apan dunay tino nga buhaton sa tino nga panahon sa koreksiyon. Uyon ba kaha sila nga gub-on? Sama sa karaang mall sa dalan Colon ug usa ka drive-in hotel sa Barangay Mabolo, moguba kaha sila sa parte sa ilang edipisyo?

Hinaut nga madali ang pagtuon nga gitumbok ni Labella sa pagkoriher sa sayop ug way pagpihig sa pagpatuman. Dili lang kutob sa konsultasyon ug saad sa mga hingtungdan.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph