Sugilanon: Pagpanampit sa mga kalag

FRED FUENTES MONTERNEL

Brgy. Lorega Proper, Cebu City


HILABIHANG lipaya ni day celing, akong magulang nga biyuda na nga maoy nag-atiman sa kabilin namong luna sa banika, dihang mibutho ko sa kabilin namong balay nga siya ang nagpuyo. Ang maong luna ug balay binilin sa among mag-uumang ginikanan nga mitaliwan na. Nobiyembre uno karon, adlaw sa mga Santos, nga sundan sa Nobiyembre dos, adlaw sa mga Kalag. Kining duha ka adlaw maoy naglangkob sa panahon sa Kalag-Kalag. Naandan na nako nga matag kalag-kalag anhi ko sa among baryo magsaulog niini.

Mahimut-on sab nga mihangop kanako ang upat ka anak ni Day Celing. Sila Celmar, Nizel, Maricel ug Maryjane nga pulos na mga ulitawo ug dalaga, nga bisan wala na makapadayon og eskuyla sa kolehiyo, may mga trabaho na sa among lungsod.

“Fred, ikaw akong tahasan sa pagpanampit sa mga kalag atubangan ning talad nga gibutangan na nako sa linutong mga pagkaon ug lamiang mga sud-an. Unsaon nga naatol man nga naadmit sa ospital sa lungsod ang mananangpit dinhi sa sityo Candangas nga si Noy Garot kay gi-atake sa hayblad. Hibawo ko nga suheto ka sa pamaagi sa pagpanampit ni anhing Tatay Vidal sa buhi pa sila si Nanay Tutay. Naa, gi-aray na sa talad ang mga pagkaon!” matod ni Day Celing nga nagpahiyom.

Niadtong orasa mao pa gyuy pagtikyop sa kilumkilom ug naluto na ang tanang pagkaon nga ihalad.

“Sige, Day Celing. Ikalipay ko nga akoy mahimong mananampit sa mga kalag ning gabhiona. Naa na ra bay mga silingan sa tugkaran nga mangalag-kalag dinhi sa inyo.” Miyanguyango ko nga nagtan-aw mga pagkaon sa talad.

Lima ka kilong karne sa baboy nga naambit ni Day Celing gi-adubo ug gihumba. Ang lima ka linaming bayungbayong manok nga nanun-o plastada nga naluto: and duha niini gilat-an nga tinibuok nga tangad ray lamas, ug ang tulo gigisado pagluto. Ang usa ka buok kanding nga giihaw ni Day Celing gi-kalderitas. Plastada usab sa talad ang daghang bibingka, biko, budbod ug pinyato. Nagkaye usab ang usa ka bangkat nga gihabwa sa nagkalidades nga siniping hinog nga mga saging tundan, gardaba, bangan, salibagyo, amarilyo ug tindok. Gi-aray usab ang usa ka galong dal-as nga tuba ug ang mga binong ilmnon ug mga sopdrinks.

Wa ko maglangan. Gipahigayon ko dayon ang seremonyas sa pagpanampit sa mga kalag niadtong gabhiona. Giuna kog sangpit ang mga kalag nilang Tatay Vidal ug Nanay Tutay. Gisunod ko ang mga kalag sa among kaparyentihan, dayon ang mga kalag sa akong kahigalaan. Gisangpit pod nako ang mga kalag sa suod kong mga magsusulat nga ‘atua na’ na sunod nga kalibutan.

“Sige, dali na kamo! Tangka na kamo sa talad ug pangaon ning lamiang mga pagkaon nga gitagana kaninyo. Naa ang dal-as nga tuba ug bino ug mga sopdrinks. Kon human na kamo mangaon, pabatia ko ninyo sa bisan unsang tingog sa mananap!” matod ko sa panapos kong pagpangagda.

Pagka taudtaod misibaw ang tingog sa mangliw didto sa punoan sa santan sa tugkaran sa balay. Unya mipuli ang sadyang kinan-anay namong tanan uban sa daghang nangalag-kalag niadtong gabhiona. Malipayon kaayo si Day Celing sa malampuson kong pagpanangpit. Nasayod ko nga diha ang mga kalag nilang Tatay Vidal ug Nanay Tutay niadtong gabhiona.

(KATAPUSAN)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph