NAREHISTRO sa panagsangka sa Brgy. Ginebra Gin Kings ug Rain or Shine Elasto Painters niadtong Martes, Oktubre 27, 2020 ang labing taas nga livestream viewers sa Philippine Basketball Association (PBA) Philippine Cup bubble sa Angeles City, Pampanga.
Ang kulbahinam nga engkuwentro diin midaog ang Elasto Painters pinaagi sa overtime, 85-82, nakahakot og 177,000 viewers sa ONE Sports Facebook Live airing.
Labing kuyaw nga nakaduwa alang sa Elasto Painters ning sangkaa mao si Beau Belga, kinsa nagpakatap og 20 puntos ug 10 rebounds.
Nalabwan sa ROS-GInebra nga duwa ang 120,000 viewers nga nakuha sa pagbalik og duwa ni Calvin Abueva niadto lang Lunes, Oktubre 26, 2020 diin natabangan sa gitawag og The Beast ang Phoenix Super LPG Fuel Masters sa pagbuntog sa NLEX Road Warriors, 114-110.
Mao kini ang labing unang higayon nga nakaduwa og balik si Abueva human sa 16 ka mga buwan nga pagserbisyo sa iyang indefinite suspension nga silot.
Ang nahisgutang mga duwa pulos wala napasalida sa free TV gumikan kay wala kini natunong sa regular airing schedule sa TV5 nga nakatakda matag Miyerkules, Biyernes ug Dominggo. (ESL)