LAING kanhi heavyweight boxing superstar ang nagplano nga mobalik og away sunod nila ni Mike Tyson ug Evander Holyfield
Gibutyag sa World Boxing News nga seryusong nagplanong mobalik ang kanhi undisputed heavyweight champion nga si Lennox Lewis, kinsa nag-edad na og 55.
Dili kini maoy labing unang higayon nga miaksyon si Lewis nga mobalik og away gikan sa pagretiro.
Niadtong 2010 dihang nag-edad pa lang og 45 si Lewis, nagplano na siyang moaway og balik hilabi na kay wala siya nakauyon sa klase sa mga away nga hatod sa heavyweight fighters niadtong higayuna.
Iyang gipanghagit ang magsuong mga Klitschko nga mao ang nanghawod sa heavyweight division niadtong panahuna.
Hinuon wala nadayon ang maong plano ni Lewis.
Niadtong 2003, gikaharong na ni Lewis ang usa sa mga Klitschko nga si Vitali ug iyaha kining gilupig aron angkunon ang World Boxing Council (WBC) heavyweight title.
Human niini, miretiro na si Lewis.
Sa pagretiro ni Lewis, nanghawod pagbalik ang mga Klitschko apan makalaay na ang mga panagsangka sa heavyweight division hinungdan nga wala na kini gisunod sa kadaghanan.
Wala gimahay ni Lewis ang mga Klitschko sa nahitabo sa heavyweight boxing.
Gipasabot ni Lewis nga wala na’y dekalidad nga mga boksidor sa heavyweight division nga makahatag og saktong binukbokay sa mga Klitschko niadtong mga panahuna.
“It’s not the fault of the Klitschkos. They came towards the end of my career,” pasabot ni Lewis.
“For the most part, they were in the next era." (ESL)