SINGLE digit na lang kun wala na makaabot ug 10 ka kaso ang matala sa dakbayan sa Lapu-Lapu sa coronavirus disease 2019 (Covid-19) sukad sa Oktubre 23 ning tuiga.
Samtang moabot na usab sa 92.3 porsyento ang recovery rate sa dakbayan niadtong Oktubre 27.
Mao kini ang gipahibawo ni Grace Mary Carungay ang Epidemiological Surveillance Officer sa kagamhanan.
Dugang ni Carungay nga sa moabot 296 ka mga swab sample sa milabayng Oktubre 27 ang tanan pulos negatibo sa Covid-19.
Sa inadlaw nga talaan sa City Health Office nagpakita nga usa ka kaso ang natala sa Oktubre 20, gisundan sa 9 ka kaso sa Oktubre 21.
Mipatong kini ug double digit nianang Oktubre 22 human makatala ug 10 ka kaso.
Apan sa Oktubre 23 nakatala lang ang dakbayan ug 2 ka kaso.
Samtang, 6 ang natala sa Oktubre 24, 2 sa Oktubre 25, 1 sa Oktubre 26 ug walay natala sa Oktubre 27.
Pasabot niini nga sa milabayng 7 ka adlaw kausa lang nakatala ug double digit nga kaso ang kagamhanan.
Sa pagkakaron ang dakbayan nakatala na ug 2,444 ka kompirmadong kaso diin moabot sa 2,256 ang nakarekober nga maoy nakapalipay ni Lapu-Lapu City Mayor Junard Chan.
Una nang nabantayan sa kagamhanan ang pagsaka sa recovery rate sa dakbayan niadtong Agusto 17.
Niadtong tungora miabot sa 77 porysento ang nakarekober itandi sa 64.77 posyento sa Agusto 7 hangtod nga karon miabot na gayud ug 92.3 porsyento.
“We’re hoping, we’re praying with this development that they are Covid–free so hopefully wa ta kahibawo nga basin kitay una nga syudad nga mabalik na sa normal nga kinabuhi,” matod ni Chan kalabot sa pagpaubos sa swab test sa mga drayber ug uban pang sektor sama sa boatmen, vendors ug frontliners.
Nanghinaot si Chan nga padayong mosunod sa health protocol ang mga Oponganon bisan kun iyang nakita nga hapit na magmadaogon ang kagamhanan sa pagbatok sa Covid-19.
Kini naglakip sa pagsul-ob ug facemask, face shield, regular nga og hugas sa mga kamot uban sa pag-santitize niini og alcohol ug pag-obserbar sa physical o social distancing. (GCM)