ANG Cebu City Government nakahuman na og panghatag sa ilang ayuda ngadto sa 530 ka mga individual nga nanginabuhi sulod ug gawas sa menteryo, Oktubre 28, bisperas sa pagsirado sa pagsirado sa mga sam-ang.
Kini ang gipahibawo ni Jonil Matuguina, operation’s chief sa Department of Social Welfare and Services (DSWS) nga nanghata sila og tag 25 kilos nga bugas aron aduna silay malung-ag sa mosunod nga duha ka semana.
Ang labing daghan nga candle vendors, flower vendors, sari-sari, sepulturero, cleaners nagagikan sa menteryo sa Calamba nga niabot og 219 ka indibiduwal, 117 sa Carreta Cemetery, 75 sa Queen City Garden, 53 sa Pardo cemetery, 38 sa St. Joseph sa Luz, 14 sa Cempark ug tag 7 sa Pit-os ug Talamban.
Ang distribution sa DSWS nga gipangulohan ni Frances Abangan nagsugod sa niagi pang semana ug gihinayhinay hangtod nahuman aron usab mapatuman ang social distancing.
Nakadawat og tag 25 kilos nga bugas humay ang 530 ka individual human sa mando ni Mayor Edgardo Labella sanglit mawad-an sila og panginabuhian sulod sa 5 ka adlaw.
Ang mayor niluwat og executive order sama sama sa gihimo sa Manila nga nagsirado sa mga pribado ug publiko nga menteryo gikan Oktubre 29 hangtod na sa Nobyembre 3 aron malikayan ang tapoktapok sa mga tawo gumikan sa presensiya sa Covid-19.
Apan taliwa sa pagsirado diin dili na makasulod ang gusto lang moduaw sa ilang mga mahal sa kinabuhi nga nitaliwan, gitugotan gihapon ni Labella ang paglubong sa mga nangamatay sulod sa mga adlaw nga sirado ang menteryo.
Adunay misa nga gitugot, 1 sa buntag ug 1 sa hapon diin ang pare, sakristan ug technical people ra ang gitugotan nga makasulod sa Nobiyembre 1 o 2 para makapamisa gihapon ang mga nahabiling tagtungod sa mga nitaliwan.
Samtang hepe sa Police Regional Office 7 personal nga mi inspeksyon sa mga terminal ug dagkong mga sam-ang sa dakbayan sa Sugbo aron masiguro ang kahapsay ug ka malinawon ning katapusang adlaw sa pagbisita sa ilang mga minahal sa kinabuhi nga mitaliwan sa laing kalibutan.
Aron masiguro nga tunhay ang pag bantay sa kapulisan sa mga pantalan, bus terminal ug mga dagkong sam-ang sa siyudad personal kining gi inspeksyon sa hepe sa Police Regional Office (PRO) 7, Police Brigadier General Albert Ignatius Ferro.
Unang gibisita ni Ferro ang North Bus Terminal nga naa sa parking area sa usa ka mall sa North Reclamation Area diin iyang gipakighinabian ang mga manakayay nga mamauli sa probinsya sa Sugbo.
Gisunod niya ang usa sa labing dako nga sam-ang sa siyudad sa Sugbo nga mao ang Queen City Garden ug naka dayeg ang heneral tungod kay natuman gyud ang minimum health standard sama sa social distancing ug ang 30 porsiento nga kapasidad sa mentiryo.
“So far, I am satisfied sa atong preparation because several days naman ta nagabantay didto sa mga sementeryo.." matod ni Ferro.
Walay nakitang problema ang heneral sa gihatag nga seguridad sa kapulisan sa siyudad sa Sugbo apan bisan pa man niini iyang mando sa hepe sa Cebu City Police Office (CCPO) nga dili mo kompyansa bisan sa kagamay ra sa mga tawo nga mibisita sa mga minteryo.
Iyang gipasabot nga bisan gipaubos na sa modified general community quarantine (MGCQ) ang tibuok siyudad ug miubos na pag-ayo ang mga natakbuyan sa Covid-19 apan dili angayan nga mokompyansa tungod kay naa pa ang virus.
Sugod karon nobembre 4 sirado ang tanang sam-ang sa tibuok nasud kini maoy hukom sa National Inter-Agency Task Force apan dinhi sa siyudad sa Sugbo magpadayon ang misa sa sulod sa mentiryo.
Matod ni Police Lieutenant Colonel Wilbert Parilla nga ang gitugotan lang nga makasulod mao ang mga pari, sakristan ug mga kaabag sa ipahigayon nga misa gikan sa buntag hangtod na sa hapon. (PAC, AYB)