NAUKAY ang katawhang Dabawenyo tungod sa kabag-ohan nga dala sa pagpatuman sa Executive Order 57 nga gipagawas sa gobyerno sa dakbayan sa Davao.
Ubos sa bag-ong kamandoan, mas gihigpitan ni Davao City Mayor Sara Duterte-Carpio ang mga kalihokan sa katawhan karong semanaha.
Naalarma ang Mayor sa kusog nga pagsaka sa mga nagpositibo sa Covid-19 nga mitukmod sa dakbayan sa Davao ngadto sa unang pwesto sa mga lugar sa nasud. Gilupig pa sa Davao ang Manila ug gipulihan sa pwesto nga may pinakadaghang kaso sa virus.
Atong masabot nga dako ang epekto niini sa atong Mayor bisan duna siya'y mga doktor nga mga adviser. Dihang gipasayo ang curfew ngadto sa ala siyete sa gabii halos ang tibook siyudad mingtiyabaw.
Sa Executive Order 57 gipatas-an ang distansya sa katawhan bisan sa mga buhatan, mga fitness gym dako o gamay, lima lang ka persona ang tugutan nga mosulod ug tag duha ka oras lang.
Mga taga simbahan mitiyabaw kay naanad sila nga sa ilang pagdayeg sa Dios dunay mga pag-awit nga karon bawal na panahon sa ilang pag-simba, gawas nga limitado na ang mga parokyano kay tagduha ka metros na ang gimtang sa katawhan sulod sa simbahan.
Daghan ang nagkanayon nga dili ang pagpasayo sa curfew maoy sulbad aron pagpakunhod sa numero sa mga natakdan sa Covid, hinuon pag-antus sa kapit-os ang mahiagoman sa katawhan.
Handom ni Mayor Sara nga mokunhod ang kaso sa Covid sa atong dakbayan apan unsaon sa pagkab-ot kung kulang sa kooperasyon ang katawhan?
Ang paggamit sa facemask ug face shield, paghugas sa kamot ug pabutang og sanitayser sa mga pultahan diin mosunod ang tanan niini, una mosulod sa mga gambalay, ang pagtuman sa social distancing makatabang unta pagpugong sa pagkatag sa virus, apan kulang sa desiplina ang kadaghanan, motuman lang kung dunay otoridad nga naga tan-aw. Kung walay nag bantay, ang health and safety protocol, ipadaplin man, porbida.
Kahasul ug kasakit ang gihatud ining virus sa katawhan. Gani man, sa paghatag og dakong pagtagad sa mga doktor sa mga pasyente sa Covid, napasagdan ug nangamatay ang uban kay wala nay dapit sa mga tambalanan kay giukopa na sa mga pasyente sa Covid-19.
Dili kini gusto ni Mayor Sara nga kahimtang labaw na nga dili niya gusto nga mag-antus ang iyang ginsakpan. Dili sab gusto sa Mayor nga mabalda ang ekonomiya sa dakbayan kay kung kamo ang naa sa iyang kahimtang unsa man ang maayo nga inyong ikapasalig sa paghupay sa kasakit nga gihambin karon sa katawhan?