DEAR Noy Kulas,
Maayong adlaw nimo diha. Sure ko nga kining akong problema naa na diri sa imong column ug ni Papa Joe.
Naa koy boyfriend. More than two years na mi niya. Sa amo nang kadugay, daghan na mi og naagian nga mga trial but we lasted this long. Duha na ka anniversaries ang among na celebrate. Sa among second anniversary, ako nang gihatag niya ang tanan, apil na ang akong self. Human nako nahatag niya, nagkadugay nakabantay na ko niya nga nagkaseloso.
Gusto na niya nga magminyo na mi aron kami na forever. Segurado na kuno siya nga ang tanan niyang gipangita sa usa ka babaye naa na nako. Pero mahadlok pa kog lifetime commitment kay daghan pa kog damgo sa akong life. But akong family sugot na kaayo, pero ako di pa ready. Noy, unsa may imong tan-aw sa akong edad nga 29, okay ra ba nga magminyo na ko? Ngano kaha nga mahadlok man ko?
JANE
Jane,
Husto na kaayo ka sa edad nga magminyo. Unya sa akong tan-aw stable ra ang inyong relasyon kay niabot na mo og kapin sa duha ka tuig. Kana rang iyang pagkaseloso tingali ang imong gamay nga problema. Hayan naingon ana sab siya nimo tungod kay alang niya, di ka angay buhian. Worried siya nga sa inyong kadugay, mapul-an ka. Unya iyang nakita nga ikaw ang perfect nga babaye alang niya, gusto na siyang iyaha kang maangkon sa hingpit.
Kanang imong fear resulta na sa mga hitabo sa palibot, sa social media diin ang mga relasyon nangaguba, natun-as tungod sa nagkadaiyang mga factor. Apan taliwa niini, daghan usab nga relasyon ang milanat ug milig-on tungod sa maayong pag-amuma sa both parties. Kay ang malampusong kaminyuon desisyon sa duha ka parties, di sa laing mga tawo. Kini ang hinuktoki.
NOY KULAS
rojval69@yahoo.com ug kulassuper@sunstar.com.ph