SUPERBALITA CEBU

Nalzaro: Mininum wage sa mga magbabalaod

Saksi

DAKO na kaayo og kalainan ang kalibutan karon. Ang mga komedyante seryuso nang moserbisyo sa gobiyerno ug ang mga pulitiko nahimo nang maayong laking mga komedyante. Sama niining usa ka sugyot sa usa kongresista nga aron ang mga pulitiko tinuod nga makatagamtam ug makabatyag sa kalisdanan sa ordinaryong mga tawo, suwelduhan ang mga senador ug kongresista sa minimum nga suholan sama sa gidawat sa ordinaryong mga mamumuo.

Mao kini ang sugyot sa party-list group Gabriela. Ang suweldo karon sa mga senador ug kongresista mokabat sa P295,000 matag buwan. Maanindot paminawon kining maong sugyot no? Mibati gyud siya sa kahimtang sa yanong mga mamumuo.

Apan matod ni Senador Richard Gordon nga kining maong sugyot impraktikal ug dakong patuo-tuo. Ug gawas nga impraktikal, atong pun-an sa termino nga pagpabilib lang sa katawhan. Sa laktod, pangilad sa publiko o ipokrito. Ug kining arte sa pagpabilib ug pagminaut labing maoy katapusang kinaiya nga atong gipaabot sa militanteng pundok sama aning Gabriela.

Kon ayuhon nato sa pagsabot, hilashilas lang ang maong sugyot. Ug morag makatuo ba kita nga nagtinakdanay silang tanan diha sa Kongreso. Morag subo nga palandungon nga sa pagkakaron, wala nay mapili kanila. Managsama na silang tanan nga nagpatuo-tuo nga mobati kunohay sa katawhan.

Kay ngano man diay, ang suweldo ra bay gisaligan sa atong nasudnong mga magbabalaod? Ang ilang allowances diay? Ang ilang mga commission ug S.O.P gikan sa mga proyekto? Ang dakong budget sa ilang district office nga ang ilang mga kabanay ra usab ang ilang mga staff. Okay lang na ang ilang suweldo kay bugti pod na sa ilang dignidad sa ilang posisyon. Ang putlon unta nato mao ang kurapsiyon.

(bobbygnalzaro@gmail.com)


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!