SUPERBALITA CEBU

Editoryal: Maayong ibalik na

(Editorial Cartoon by Ariel Itumay)

SUKAD nga gipailawom sa modified general community quarantine ang Dakbayan sa Sugbo, daghan nang mga industriya ug negusyo ang ningbukas. Ang kahimtang sa trapiko nagpakita nga hapit na normal ang tanang dagan sa kinabuhi, gawas lang sa pagbukas sa klase.

Tuod, hapit na mamalik tanan sa pagbukas, apan ang kahimtang sa pampublikong sakyanan gamay ra og kausaban, labina sa mga siyudad sa Sugbo ug Mandaue.

Liboan ka ordinaryong mga mamumuo gaantos sa daplin sa karsada gahuwat og masakyan sa labing minos usa ka oras. Naay ubang mga dapit maihap lang sa tudlo ang gidaghanon sa mga bus nga namasahero. Grabe na ang reklamo sa publiko sa kalisod sa pampublikong transportasyon, apan taudtaud sab nga giyak-an ang yangongo sa publiko nga nanginahanglan niini. Ipamugos man gud nga total wagtangon na man ang tradisyunal nga mga PUJ sa kadalanan, maayo nang sugdan karon.

Apan sa lakat karon, klaro nga di makasarang sa panginahanglan ang dagkong mga bus nga naa sa kadalanan. Kon nahatag pa ang panginahanglan, di unta magbaha ang mga reklamo sa social media sa kakuwang sa mga pasaheroang bus.

Maayo na lang kay nangusog ang administrasyon ni Mayor Edgardo Labella nga pabalikon ang tradisyunal nga mga PUJ sa kadalanan tungod sa kataas sa panginahanglan sa publiko. Nangutana gani siya nganong gitugtan man ang mga PUJ sa pagdagan sa ubang mga dapit sa Metro Cebu, apan wa dinhi sa kinapusoran ug sentro sa patigayon.

Hinaut pa nga madali ang pagpabalik sa tradisyunal nga mga PUJ sa kadalanan, labina sa mga dapit nga kuwang kaayo ang publikong transportasyon aron maundang na ang pag-antos sa mga sumasakay nga kada adlaw maglisod pagsakay padung sa trabahoan ug pag-uli sa balay. Di ra ba makasakay sa kalisod ang public officials kay naa silay tagsa ka luhong sakyanan. Di sab sila kakita kay mangatulog ra man sila.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!