SUPERBALITA CEBU

Tigbakay sa Lacion gi-raid; 10 nasikop

DAKPAN: Mao kini ang 10 ka mga tawo nga nadakpan sa kapulisan sa ilang gironda nga tigbakayan sa Barangay Jugan, lungsod sa Consolacion. (Benjie B. Talisic)

NAPULO ka mga lalake ang gipangpusasan sa mga pulis atol sa hiniusa nga pagronda sa usa ka illegal nga sabong sa Barangay Jugan, lungsod sa Consolacion niadtong Martes pasado ala una sa hapon.

Ang mga sakop sa Regional Intelligence Unit (RIU) ug Regional Special Operations Group (RSOG)-7 uban sa Consolacion Police Station ang ningronda sa tigbakay.

Si Police Major Vernino Noserale, hepe sa Consolacion Police Station maoy nangu sa ronda kuyog ang mga operatiba sa RID ug RSOG 7.

Ang mga sugarol nga nadakpan giila nga sila si Alex Ocubillo, 62, taga Barangay Luz, Dakbayan sa Sugbo; Romeo Siacor, 48; taga Barangay Casili, Consolacion; Kenneth Ouano, 31 ug Giovanie Abing, 24, pulos taga Barangay Ibabao, dakbayan sa Mandaue; Arnold Nuñez, 38, taga Barangay Maguikay; Danny Canoy, 48, taga Barangay Cabangcalan, pulos sakop sa dakbayan sa Mandaue.

Lakip usab nga nadakpan si Raymond Dianon, 48, taga Barangay Cotcot, Liloan; Dannis Ygoc, 47; Germelindo Morillo, 69, ug Meljun Ochea, 28, pulos taga lungsod sa Compostela.

Ang operasyon gihimo tungod sa mga reklamo sa pipila ka mga residente duol kalabot sa illegal nga pasugalan.

Ang sumbong gisusi sa mga sakop sa intelligence operatives ug nakompirmar kini.

Nasuta usab sa RIU nga dagko ang pustahanay.

Dugang ni Noserale nga dunay nakasibat tungod sa gilay-on sa dapit gikan sa dalan ug dali makaatikod ang mga tawo kon mangabot ang mga awtoridad.

Ang mga nadakpan mag-atubang og kasong kalapasan sa Presidential Decree (PD) 449 o illegal cockfighting.

Atol sa dakop, nasakmit sa mga pulis ang duha ka mga manok igtatari ug mga gamit sa pangtari, lakip na usab ang kwarta nga moabot sa P1,5000 nga gituohang pusta.

Gipasabot ni Noserale nga ang narekober nga kwarta nga gitoohang maoy ilang pusta gamay ra sa tinud-anay nga gidak-on sa pusta kay mao pay pagsugod sa sultada. (BBT)


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph