SUKAD sa Oktubre 1 hangtod sa Oktubre 28, 2020, ang Traffic Patrol Group (TPG) sa Cebu City Police Office nakatala na og 21 ka mga insidente sa panagbangga nga naglambigit sa mga bus sa dakbayan sa Sugbo.
Ang labing grabe nahitabo niadtong Dominggo, Oktubre 26, 2020 diin duha ang patay sa bangga tali sa usa sa mga bus niini ug ambulansya.
Matod ni Police Police Lieutenant Colonel Clark Ariola, hepe sa TPG, nga sa 21, ang 15 kun 75 porsyento naglambigit sa mga bus sa Ceres. Matod ni Ariola nga ang TPG ug Cebu City Transportation Office (CCTO) kanunay nagpahinumdom sa mga drayber sa pampublikong mga sakyanan nga mag-amping sa pagmaneho, apan naa gihapoy mga disgrasya.
Nakapaalarma kini kanila hinungdan nga sila nakig alayon sa Land Transportation Franchising Regulatory Board (LTFRB) alang sa ilang angay nga pagabuhaton.
“Tungod aning sunod sunod nga panagbangga nga naglambigit sa bus, nakig-alayon ta sa LTFRB. Unya atong nahibaloan nga ang LTFRB nagpadala na og show cause order ngadto na sa Ceres bus. So, mo sit in ta didto,” matod ni Ariola.
Ilang sutaon nganong sa mga aksidente sa karsada nga naglambigit sa mga bus, kinabag-an ang naglambigit sa ilang mga sakyanan.
“So, naay mahimo nga pag-atubang. Naay mahimo nga inbestigasyon didto sa LTFRB. So, didto pud nato ma find out kon unsa gyud ang rason,”dugang ni Ariola.
Ang panagtagbo gitakda sa unang semana sa Nobiyembre.
Matod niya nga wa sila magkuwang sa pahimangno sa mga drayber sa balaud sa trapiko alang sa kaluwasan sa karsada.
“Atoa nang gi-remind ang mga drivers kaniadto pa nga sa open roads is 40 km. per hour samtang sa interior roads is 20 km. per hour. Apan maglisod lang ta og implementar niana kay wala man tay speed gun,” matod ni Ariola.
NAMATAY
Samtang si Leoret Sumalinog, konduktor sa Ceres bus nga kritikal sa bangga niadtong hapon sa Oktubre 25, namatay sa tambalanan diin siya gidala tungod sa grabeng mga samad ug bun-og. Samtang ang drayber sa Ceres bus nga si Benedicto Calduzo anaa nagpabilin pang naadmit sa ospital, naka hospital arrest na.
Matod ni Police Senior Master Sergeant Edgardo Bicoy sa Mabolo Police Station nga nahinabi sa Superbalita Cebu, si Calduzo hingpit nang napasakaan og kasong reckless imprudence resulting to homicide ug multiple serious physical injury.
Mosunod niini ang damage to property sanglit nga wala pa nakapasa ang Siyudad sa mga propedad sa kagamhanan nga naapil og kaguba.
Matod ni Arriola nga kon basehan ang balaod, kinahanglan nga ang bisan unsa nga sakyanan mohatag og higayon sa mga patrol car sa kapulisan, fire truck, ilabi na sa mga ambulansya nga makaagi. (dugang taho ni AYB)