DAKONG hiwa-tinigbasan sa tangkugo ang naangkon sa biktima nga namatay ra sab pag-abot sa ospital human gitigbas sa buko vendor gamit ang hait kaayo nga chopping knife sa butong.
Ang insidente nahitabo alas 11:10 sa gabii niadtong Miyerkules didto sa Makiling Street, Central Park Subd., Bangkal, Barangay Talomo Proper, Davao City.
Patay na nga miabot sa ospital ang biktima nga si Ricoyan Dales Dela Cerna, 20 anyos, residente sa Taal 1, Bangkal, siyudad sa Davao.
Nasayran nga gikan na-mirtdey ang biktima uban sa iyang mga higala dihang pauli na sila, nasugatan nila ang grupo sa suspek, hinungdan nga natigayon ang rambol.
Gilayong gikuha sa suspek nga si Reneboy Lingasa Artiaga, 20 anyos, lumad nga taga San Pedro, Kiblawan, Davao del Sur, ang panghiwa sa butong dayon iyang gitigbas ang biktima.
Giingon nga mitabang pa sa krimen ang laing duha pa ka menor de edad nga kaubanan sa suspek.
Daling mitahan ang suspek sa kapulisan kinsa pasakaan kini og kaso kagahapon, Oktubre 29.
Gihaya na ang biktima sa iyang mga kabanay.