Mga duwa karon
4:00 pm- Magnolia batok NorthPort
6:45 pm- San Miguel batok Ginebra
Gilauman ang grabeng ‘hinubganay’ sa panagtagbo sa defending champion San Miguel Beermen ug Brgy. Ginebra Gin Kings sa main game karong gabii sa 2019-20 Philippine Basketball Association (PBA) Philippine Cup bubble sa AUF Gym sa Angeles City, Pampanga.
Ang duha ka mga kampo parehong naggunit og 4-2 nga rekord nga kasamtangan nagpahiluna kanila sa triple-tie sa ikatulong dapit kauban ang Phoenix Super LPG Fuel Masters.
“Alam naman ng lahat na kapag magkalaban kaming dalawa talagang walang bigayan iyan. It’s always a war,” matod ni San Miguel coach Leo Austria.
Ang Beermen gikan sa tulo ka sunodsunod nga kadaugan nga seguradong naghatag kanila og dugang kadasig alang ning sangkaa hilabi na kay gikan sa duha ka sunodsunod nga kapildihan ang Gin Kings.
Hinuon mas taas og pahuway ang Gin Kings kumpara sa Beermen ug mao kini ang ilang bintaha ning sangkaa.
“Medyo difficult task for us,” pag-angkon ni Austria. “Alam naman ng lahat, kahapon lang kami naglaro, sila naka-rest ng two days. At saka kagabi napuno most of the starters ko. We’ll see their condition in practice later and how they’ll respond tomorrow.”
Gikan man tuod sila gikan sa duha ka sunodsunod nga kapildihan apan malaumon si Ginebra coach Tim Cone nga makabawi na sila ning higayuna.
“We just feel we played two really good teams which made big shots down the stretch to beat us,” asoy ni Cone. “We’re not ready to panic.” (ESL)