MGA pahalipay ngadto ni Rabiya Mateo (Iloilo City) sa paglangkat niya sa korona isip Ms. Universe Philippines 2020.
Pahalipayan usab nako ang mga dama nga sila si Ma. Ysabella Ysmael (Parañaque City), Michelle Gumabao (Quezon City), Pauline Amelinckx (Bohol) ug Kimberly Hakenson (Cavite City).
Nagpasabog sa iyang pagka-aslom nga pildero si Sandra Lemonon.
Niadto sa Bb. Pilipinas 2018, wa siya katubag sa pangutana bahin sa ‘Build, build, build’ nga proyekto ni Presidente Rodrigo Duterte.
Nakaingon ko nga kon hurado pa ko, hatagan gihapon nako siyag dakong puntos kay wa siya magkalat sa tablado bisan pa nga wa siya katubag.
Karon, lahi na ang akong pagtan-aw niya, kining iyang mga pasangil, nga duda nako di gyud niya mapamatud-an, di man gihapon makahimo niyang rayna.
Nilabay na ang iyang kahigayunan.
* * *
Nakadayeg ko ni Stella Marquez-Araneta kay iyang gitugtan si Gazini Ganados nga mokorona sa Ms. Universe Phils. 2020 isip rayna sa niaging tuig bisan tuod lain nang organisasyon ang nagpadagan sa bangga sa kaanyag.
Saludo usab ko ni Gazini sa iyang pagpasalamat sa iyang farewell speech sa mga Cebuano nga nakatabang niya lakip na si Cary Santiago ug anhing Jonas Borces.
* * *
Ipahigayon sa Palm Grass Hotel ang forum nga Syodi! Witches or Spiritual Leaders ugma, Oktubre 31, 4:30 pm.
Tukion ang pre-colonial worship ug impluwensya sa spiritual leaders babaylan) ni Fr. Brian Brigoli.
Ang Bahaghari, Pride Team ug Cebu United Rainbow LGBTIQ+ Sector (Curls) mopa-ambit usab sa ilang nahibaw-an bahin sa babaylan ug mga kasinatian sa trabaho. Mopasundayag si Madam Ligaya Rabago og babaylan ritual.
* * *
Nalipay na unta si Susan Valencia, kanhi kauban nako sa Kapitolyo nga taga Carcar City, nga nakakitag balik sa “It’s Showtime” ug uban pang proyekto sa ABS-CBN pero nasubo sab siya dayon kay may hungihong nga ipaimbistigar na usab sa Kongreso ang panagkumboya sa ABS-CBN ug Zoe TV nga niresulta sa A2Z Channel 11.
Di ko mosupak sa lakang sa mga magbabalaud kon ugaling may kalapasan man gyud nga nahimo pero maayo untag mangita silag win-win solution aron makaingon ta nga ila usab diay gihunahuna ang katawhan nga kunohay ilang gialagaran.
Duna mi something in common sa Kapuso actor nga si Rocco Nacino plantito sab diay ni siya. Abi ninyog unsa?
Niangkon kini nga ang pag-atiman sa mga tanom uban sa iyang plantita nga palalab nga si Melissa Gohing nakapalig-on sa ilang relasyon.