SAGAD sa hinungdan sa mga aksidente sa trapiko mao ang nanghinobrang kakusgon sa pagdagan sa mga sakyanan sa kadalanan. Ang timailhan niini mao ang pagpalyar sa brake. Kasagaran hinungdan sa pagpalyar sa brake mao ang nanghinobrang kakusog sa dagan ug kabug-aton sa karga.
Sa Pilipinas, 10 ka tawo matag 100,000 sa populasyon ang mangamatay matag tuig tungod sa traffic accident.
Matod ni Cebu City Police Office traffic head Police Lieutenant Colonel Clark Arriola nga maglisod sila pagdeterminar kon ang usa ka sakyanan milapas ba sa speed limit sa dan nga giagian kay way speed gun nga magamit ang kapulisan.
Ang speed gun tukma nga magsukod sa kakusgon sa dagan sa usa ka sakyanan. Kon makalapas, ebidensya kini kon nag overspeeding ba o wa ang drayber, labina sa usa ka aksidente.
Matod ni Arriola nga gamit unta sa pagdisiplina sa mga drayber ang speed gun kay masikop sila kon mag overspeeding. Di na man makapanghimakak ang drayber kon kini ipakita kay kinsa may makalalis sa usa ka electronic device nga accurate ?
Samtang wa pay plano ang Siyudad sa Sugbo sa pagbutang og speed sensors sa mga dapit nga dunay taas nga mga kaso sa aksidente, ang speed gun igo na’ng makatapak sa panginahanglan. Mas barato ang speed gun ug di pa mabinuangan kay madala ra man.
Ang Siyudad sa Davao dunay speed guns sa ilang pagpanakop og mga drayber nga nag overspeeding. Ang mga drayber mag-amping kanunay nga di molapas sa gitakdang 30-kilometer per hour nga speed sa city roads kay naa may mga traffic enforcer ug pulis nga nagbitbit og speed guns.
Panahon na karon nga ang Cebu City mopalit og speed guns aron masanta kining mga drayber nga ingon sa way kahadlok sa kamatayon sa ilang pagpadagan sa sakyanan. Di ba mas adunahan man kaha ang Cebu City? Nganong di man makapalit sa importante kaayo nga speed gun?