MIDALA og trapik ang aksidente sa Ceres bus ug pick-up sa interseksyon sa dan U.N. Avenue ug M.C. Briones St., Mandaue CIty, Oktubre 29, 2020, alas 3:10 sa hapon.
Sa pakighinabi sa Superbalita Cebu ni Arnold Malig-on, ang operations head sa Traffic Enforcement Agency of Mandaue (Team), nga nadawat ang duha ka sakyanan gikan sa Norte nga nagsubay sa dan Cebu North Road.
Samtang gahunong og nagpaabot nga mo-go signal sa mo-left turn, anaa sa zipperlane ang pick-up truck samtang ang Ceres bus anaa sa tupad nga linya.
Pag-signal na sa 'go' dungan nga ni-left turn ang Ceres bus og ang pick-up hinungdan nga nag-abot sila sa tunga sa interseksyon.
Naguba ang headlights ug nabali ang side mirror sa pick up samtang ang Ceres bus nagaras sab ang wala nga bahin.
Nakuha dayon ang duha ka sakyanan sulod sa 10 ka minutos apan mao kini ang trigger point hinungdan nga mihuot ang trapiko sa U.N. Avenue ug M.C. Briones ug ang mga buot gikan sa norte nga buot mo-left turn gipaditso una sa Maguikay flyover.
Miangkon si Malig-on nga dili kini ang una nga higayon nga adunay disgrasya sa dakbayan sa Mandaue City nga nilambigit sa Ceres Bus.
Dugang niya nga matag madisgrasya kini makaamot kini sa trapik tungod sa kadako sa mga Ceres bus nga makaali gyud sa dalan. (KFD)