GIDILI na usab ang pag-videoke sa dakbayan sa Lapu-Lapu panahon sa adlaw ug lawom nga kagabhion.
Kini ang nadesisyonan ni Lapu-Lapu City Mayor Junard Chan human nga nakadawat siya ug daghang reklamo sa mga ginikanan nga matugaw ang klase sa online sa ilang mga anak gumikan sa kasaba sa pag videoke sa mga commercial, public ug residential area sa dakbayan.
Lakip usab sa nadawat sa mayor nga reklamo mao ang pagkabalda sa mga online nga trabaho sa mga nagtamod sa work from home WFH nga set-up.
Nunot niini daling miluwat si Chan og executive order No 2020-82 aron pag regulate sa videoke panahon sa ting klase ug trabaho.
Lakip sa gidid-an ang mga commercial areas sa dakbayan nga adunay videoke operation.
Sa naasoyng kamandoan gidili sa Lapu-Lapu ang pagvideoke gikan sa alas 7:00 sa buntag hangtod sa alas 5:00 sa hapon.
Ug ingon man gikan sa alas 10 sa gabie hangtod sa alas 5:00 sa kaadlawon. Lunes hangtod sa Biyernes ang naasoyng EO ni Chan.
Mahimong hinuong maka- videoke ang mga residente sa dakbayan sa alas 5:00 sa hapon hangtod sa alas 10:00 sa gabie matag adlaw ug ingon man sa tibuok adlaw sa Sabado ug Dominggo.
Gitahasan sa mayor pagpaimplementar sa naasoyng regulasyon mao ang Lapu-Lapu City Police Office (LCPO) ug barangay officials.
Ang naasoyng kamandoan naglakip sa mga barangay sa tibuok dakbayan lakip na sa isla sa Olango.
Giawhag ni Chan ang publiko sa pag-report sa iyang buhatan kun adunay mabantayan nga mag-videoke sa ilang lugar nga wala aksyoni sa mga awtoridad.
“This executive order shall take effect immediately and shall remain in force unless otherwise superseded or modified by subsequent Executive Order and other issuances,” tipik sa kamandoan nga gipagawas ni Chan.
Samtang sa dakbaya sa Toledo, aron dili matugaw ang pag tuon sa mga tinun-an sa dakbayan sa Toledo, gimando ni Toledo City Mayor Marjorie Perales ang pag-ban sa pag videoke sa syudad gikan sa Lunes hangtod sa Sabado.
Ang executive order 73 maoy giluwatan ni Perales nga sundon sa mga konstituente niini.
Usa sa nabalak-an sa mayor mao ang kasaba sa palibot kon may mag-videoke ug tungod niini di na maka tulin sa pag tuon ang mga tinun-an ilabi na kadtong may online classes og nag answer sa modules.
Dili pwede ang pag videoke sugod sa alas 7:00 sa buntag hangtod sa alas 5:00 sa hapon gikan sa Lunes hangtod sa Sabado.
Ang maong kamandoan epektibo ubos sa paglanat sa modified general community quarantine (MGCQ).
Gawas sa mga pribado ug pampubliko nga karaoke o videoke lakip sa gipahinungdan sa maong direktiba ang mga sakyanan sa kadalanan.
Ilabi ma kadtong mga sakyanan nga magpatukar og kusog kaayo samtang mo badhas sa kadalanan.
Aron masiguro nga sa maong mga oras walay mag videoke, gitahasan sa mayor ang kapulisan, barangay tanod ug barangay kapitan sa pag pakatap sa impormasyon og pag-roving. (GCM, ANV)