Vendors sa DILG clearing: grabe, way balatian

“UNSA ma’y ilang alternate plan para sa mga apektado? Sakita ana, Ma’am oy. Maayo pag namatay nalang mi sa Covid ana para di mi masakitan og wala nay kapaingnan ang mga vendors. Grabeha sad,” padayag ni CCUVA president Maria Pino sa laing mando sa clearing operation sa mga sidewalk nga giluwatan sa Department of the Interior and Local Government (DILG).

Si Pino, presidente sa Cebu City United Vendors Association (CCUVA), niingon nga gisakitan sila sa labing uwahi nga memorandum nga giluwatan sa DILG.

Matod ni Pino nga wa pa gani sila makabalik sa pagpaninda, naa na sab kining laing memorandum nga nagbabag sa ilang pagpanginabuhi.

Dunay 700 ka sidewalk vendors sa Siyudad sa Sugbo nga naapektuhan sa road clearing operations dihang kini gipatuman sa 2019.

“Grabe ka way balatian ba. Wa pa gani kabalik paninda unya mag-clearing na pod,” matod ni Pino sa usa ka interview.

Si Pino makigtagbo sa laing mga lider sa mga kapunongan sa mga manindahay aron makahimo sila sa mga lakang nga pagahimuon agi og tubag sa labing uwahi nga kalamboan.

MANGITA OG PAAGI

Bisan tuod kon motuman ang Siyudad sa Sugbo sa labing uwahing mando, mangita si Mayor Edgardo Labella og alternatibong lakang aron di maapektuhan ang panginabuhian sa mga manindahay.

Duna nay adlaw ug sistema nga gipatuman si Labella dihang wa pa maigo ang coronavirus pandemic, sama sa pagbutang kanila og pwestong di makababag sa sidewalk.

Dihang niigo ang pandemic, naundang tanang vendors sa pagpaninda kay kini gidili taliwa sa hulga sa Covid-19.

Ang vendors nanghangyo kang Labella nga sila pabalikon, apan nag-umol pa og mga lakang ug polisiya ang City Hall ingon man ang vendors associations.

Ang clearing operation ipahigayon sa Nobiyembre 16, 2020 hangtod sa Enero 15, 2021.

Matod ni Labella nga bisan kon wa pa ang bag-ong direktiba gikan sa buhatan ni Secretary Eduardo Año, ang Cebu City wala magkulang sa paglimpyo, labi na sa mga sidewalk.

Iyang gipahimug-atan ang wa pagpabalik sa Siyudad sa mga vendor ngadto sa ilang orihinal nga pwesto kaniadto gumikan sa kamanduan sa buhatan, apan gipangitaan sila og laing alibyo aron maluwas ang ilang inadlaw adlaw nga panginahanglan sama sa paghatag og relocation site.

Ang DILG niingon nga kadtong mga lugar sa Pilipinas nga napaubos na sa modified general community quarantine (MGCQ) sama sa dakbayan ug tibuok Sugbo kinahanglan mag clearing operation.

Si Labella niingon nga iyang ipatuman ang direktiba sa DILG apan sa samang higayon, pangitaan og paagi para dili makulban sa ilang panginabuhian ang vendors.

“We have to strike a balance between public welfare to be imposed by the government and earning a living. We have to find ways because people are suffering. Daghan ang nagkalisod, daghan ang way kapanginabuhian,” matod ni Labella.

Ang DILG nisuspenso sa ilang road clearing operation sayo niining tuiga gumikan sa pag-abot sa Covid-19 sa Pilipinas.

Ang apektadong vendors sa dakbayan nakadawat na og mga ayuda gikan sa City Hall ug P20,000 nga balor sa grocery items gikan sa Department of Labor and Employment.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph