SUPERBALITA CEBU

Philhealth 7, ospital nagtumo-tumo? gikiha sa NBI 7

IMBESTIGASYON: Gipakita ni National Bureau of Investigation (NBI) 7 Regional Director Reynan Oliva ang daghang mga kahon nga ilang gisudlan sa liboan ka mga dokumento nga ilang gigamit sa nagpadayong imbestigasyon sa Philippine Health Insurance Corporation (Philhealth) 7. Mga opisyal sa Philhealth ug usa ka ospital ilang gipasakaan og kasong kurapsyon. (Amper Campaña)

TUNGOD sa giingong pagpanglimbong sa mga opisyal sa Philippine Health Insurance Corporation (PhilHealth) ug Perpetual Succour Hospital labot sa claims sa coronavirus disease (Covid-19) patient, ang National Bureau of Investigation (NBI) 7 nipasaka og kaso.

Napalgan sa imbestigasyon nga di Covid-19 ang namatyan sa pasyente, kon di ordinaryo lang nga pneumonia.

Bisan pa niini, giingong ni-claim ang tambalanan og reimbursement ubos sa coronavirus disease (Covid-19).

Walo ka mga opisyal ug mga empleyado sa PhilHealth 7 ug upat ka mga opisyal sa Perpetual Succour Hospital sa dakbayan sa Sugbo mag-atubang og kasong korupsyon.

Usa sa gibasehan sa ahensya mao ang pagsumiter sa Perpetual Succour Hospital sa claim alang sa PhilHealth Covid-19 reimbursement nga moabot og P333,519.

Kini bisan kon negatibo sa coronavirus disease (Covid-19) ang usa ka pasyente nga taga lalawigan sa Sugbo base sa resulta sa polymerase chain reaction (rRT-PCR) test niadtong Hulyo 2020.

Nalakip sa mga akusado mao sila si Arlan Granali (PhilHealth 7 acting regional vice president); Dr. Francis Javier, HCDMD division chief; Dr. Joan Tiu-Ayuson, benefits administration section chief; Josette Bacalso, fiscal controller; Dr. Reginal Mangubat, benefits administration officer; Anecito Ramas Jr., social insurance officer; Anthonneette Lerios Maamo, benefits administration clerk; ug Kenneth Aguilar Donalvo, social insurance assistant.

Sa habig sa PSH, gikiha mao sila si Sister Brenda Mondares, financial management manager; Gladys Sarmiento, assistant department manager; ug billing officers Jaye Anne Carcueva Arañas ug Gina Misagal.

Subay sa imbestigasyon sa NBI-7, niabot sa P261,129.64 ang bayranan sa pasyente sa hospital.

Naglakip na niini ang P161,073 nga bayranan sa pagka admit sulod sa duha ka adlaw ug P261,129.64 alang sa professional fee sa lima ka attending physicians.

PNEUMONIA

Apan sa pakisusi, nasuta nga ordinaryo lang nga kaso sa pneumonia ang namatyan sa pasyente, diin ubos sa Updated Medical Case Rate alang sa pneumonia-high risk, moabot lang sa P32,000 ang bayran.

Matod ni Oliva nga gisusi sa mga imbestigador ang mga opisyal.

Daghan kini og rason, sama sa pagtumbok sa Circular No. 9, Se.2020 sa Philhealth ug wa na makapangayo sa kopya sa RT-PCR test sa pasyente nga magsulti kon positibo ba o di.

Ang mga akusado moatubang sa mga kaso nga may kalambigitan sa pagsupak sa Republic Act 3019 o ang Anti-Graft and Corrupt Practices Act, violation sa Code of Conduct ug Ethical Standards sa mga Public Officials, malversation of public funds ubos sa Art. 217 sa Revised Penal Code ug kasong administratiba alang sa mga misupak sa EO 292, Revised Administrative Code for Dishonesty, Neglect of Duty ug Misconductuog incompetence sa performance ug inefficiency sa official duties niini.

Si Atty. Rennan Augustus Oliva, direktor sa NBI 7, nagkanayon nga usa sa irregularities nga ilang nasuta mao ang pag-refer sa pipila ka mga kaso nga inay ordinaryong pneumonia lang, nagpositibo sa Covid-19.

“Gi-file namo ang kaso kay ang resulta sa among investigation showed nga duna gyud irregularity nga bisan og dili positive sa Covid, gi-claim nila as Covid. Nya ang part sa PhilHealth nilusot sa ila ang claim nga Covid rin, unya sa ebidensya will show nga dili gyud Covid. Ang hospital pod, ang Perpetual Succour, ni claim pod nga Covid nga dili man masulod sa Covid kay ang PCR test showed nga negative ang result sa PCR. So, basically mao na ang reasons sa akong pag-file,” matod ni Oliva.

Dugang ni Oliva nga dili kini maoy uwahing pasyente nga ilang susihon sanglit may moabot 100 ka mga kaso pa kining gi-tuki lukop Central Visayas.

“We’re investigating tons of claims for Covid19. And there is a likelihood that cases claimed as Covid-19 but the truth is, they are not,” matod ni Oliva.

Ang PhilHealth 7, pinaagi sa ilang official website, nipadayag nga daw sila ang nahimong hugaw bisan sa pagkooperar sa mga opisyal niini atol sa imbestigasyon, gipsakaan na hinuon sila og kaso.

“It is unfortunate, however, that NBI-CEVRO has chosen to resort to a virtual trial by publicity, as this inevitably tarnishes the integrity and reputation of the Regional Office and its employees, and leads to further social media backlash that does not distinguish between guilty and innocent,” matod sa Philhealth.

Samtang gipahihaw ni Atty. Jose Ray Bael, legal counsel sa PSH, nga wa pa nila madawat ang kopya sa kaso nga gi-file.

Siya nipasalig hinuon siya nga moluwat og pamahayag sa daling panahon.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph