Ang Perpetual Succour Hospital (PSH) nanghimakak sa alegasyon nga nalambigit sila sa pagpanglimbong nga may kalambigitan sa Covid-19 Philhealth benefit claims.
Sa usa ka pamahayag nga gipadala sa SunStar Cebu sa Biyernes, Oktubre 30, 2020, ang PSH niingon nga sila “strongly confident (masaligon kaayo)” nga ang claim alang sa pasyente nga usa sa mga kaso nga giimbestigar sa National Bureau of Investigation (NBI) 7 way gitagoan ug kini “based on medical diagnosis of competent and respected medical professionals (gibase sa medikal nga paghiling sa takus ug tinahod nga medical professionals).”
"The claim was supported by medical records submitted to PhilHealth and passed scrutiny and applicable criteria set by PhilHealth," matod sa tipik sa ilang official statement.
Ang NBI 7 nipasaka og daghang mga kaso niadtong Oktubre 29 batok sa walo ka rehiyonal nga mga opisyal sa Philippine Health Insurance Corporation (Philhealth) 7 ug upat ka mga opisyal sa PSH sa Dakbayan sa Sugbo tungod sa giingong kalambigitan sa anomalusong claims sa Covid-19 benefit.
Giingon sa reklamo nga ang pasyente negatibo sa coronavirus disease (Covid-19) base sa resulta sa PCR test, apan gi-claim nga nasakit og Covid-19 bisan kon yanong pneumonia ang namatyan.
Matod sa PSH nga kon ang complaint i-serve ug madawat na sa hingtungdan nga FMS personnel sa PSH, moduso sila og detalyadong kamatuoran ug legal nga tubag nga pamahayag luwatan ug iduso ngadto sa Office of the Ombudsman Visayas.
Kini magmatuod sa ilang ka walay sala ug way pagpanglimbong ug dautang katuyoan sa pag-andam ug pagduso sa Philhealth claim alang kang Patient X.
Kini nidugang nga ang NBI way nakitang rason o basihanan sa pagkiha sa medical professionals nga maoy ninghiling.
"How can the FMS personnel who faithfully filed the claims based on the diagnosis and medical records be held responsible for fraud? (Ngano nga ang FMS personnel kinsa matinud-anon nga ni-file sa claims base sa paghiling ug medical records mao may pasanginlan sa pagpanglimbong?)" pangutana ni manlalaban Jose Ray Bael, abogado sa PSH.
Dugang pa, ang PSH niingon nga “unfortunate (alaot)” nga ang NBI 7 nituyo sa pahibawong pampubliko sa pagpasaka og mga kaso batok sa upat ka mga opisyal sa PSH ug personnel tungod sa giingong malimbungon nga claim sa Philhealth bisan wa pa sila hatagi og kopya sa giingong complaint ug hatagan og kahigayunang makatubag.
"The public announcement through traditional and social media has shocked the PSH community (Ang publikong pagpahibawo pinaagi sa tradisyunal ug social media nakapakugang sa PSH community)," siya nidugang.
Ang taga Philhealth 7 nga gipangkiha ngadto sa Ombudsman Visayas mao sila si: Arlan Granali (acting regional vice president), Dr. Francis Javier (HCDMD division chief), Dr. Joan Ayuson (Benefits Administration Section chief), Josette Bacalso (Fiscal Controller), Dr. Reginal Mangubat (Benefits Administration officer), Anecito Ramas Jr. (Social Insurance Officer), Anthonneette Maamo (Benefits Administration clerk), ug Kenneth Donalvo (Social Insurance Assistant).
Samtang ang gikiha habig sa PSH mao sila si Sister Brenda Mondares (financial management manager), Gladys Sarmiento (assistant department manager), and billing officers Jaye Anne Arañas ug Gina Misagal.
Ang mga kaso naglakip sa kalapasan sa of Republic Act 3019, or Anti-Graft and Corrupt Practices Act, Code of Conduct and Ethical Standards of Public Officials, ug malversation of public funds.
Duna say gipasakang mga kasong administratiba. (WBS)