DAVAO DEL NORTE -- Gitin-aw ni Sangguniang Bayan Member Roger Laguna ang mga nikatag nga istorya sa posibleng pagpailawom og lockdown sa probinsiya gumikan sa nagkataas nga ihap sa local ug community transmission sa Covid-19.
Si Laguna nga nahinabi sa Superbalita Davao pinaagi sa selpon alas 10:30 sa buntag kagahapon, Oktubre 30, nagkanayon nga wa pa'y final guidelines kabahin sa maong huhungihong ug ila pa kining gihuwat.
Hinuon, giklaro ni Laguna nga kung mahitabo man ang maong lakang, wa magpasabot nga di na makasulod ang gikan sa laing mga dapit o gikan sa laing probinsiya.
Sumala pa nga ang lockdown posibleng mapatuman sa pipila ka mga high risk area ug dili ingon nga sa tibuok probinsiya.
Sa programang "Yes sa Probinsiya" sa PTV-Davao del Norte, si Governor Edwin Jubahib nagklaro nga dunay guidelines nga hugot nga ipatuman sama sa pagbalik sa curfew nga 9:00 sa gabii hangtud 5:00 sa kaadlawon.
Hugot sab nga ipatuman ang polisiya nga "terminal to terminal" sa mga public utility vehicles (PUVs) ug uban pa nga ipatuman sulod sa usa ka bulan gikan Nobyembre 3 hangtud sa Disyembre 3, 2020.
Gilauman nga ang final guidelines ipagawas sa Martes, sunod semana, Nobyembre 3, 2020.
Dugang pa nga ang maong lakang himuon aron mapugngan ang nagkataas nga ihap sa mga nagpositibo sa Covid-19 sa probinsiya diin ning kasamtangan aduna nay 137 ka mga aktibong kaso sa sakit. (Dexter T. Visitacion)