MAGSAYSAY, Davao del Sur -- Gibasol sa pipila ka motorista nga nangahaybol sa may overflow sa Barangay Lower Bala sa lungsod ang kalit nga pagpakita sa "white lady" kanila.
Sayo ning bulan, tulo ka mga hubog ang nahaybol sa ilang gisakyang motor ug nangahagbong sa sapa human nga giingong mipatim-aw ang giingong "white lady."
Nabaniog sa mga silingang dapit sa lugar ang giingong babayeng nakasul-ob og kolor puti nga sinina nga kalit lang mopakita pag-abot sa maong dapit.
Gipamatud-an sa usa ka Rhonnie Jun Otero ang iyang kasinatian dihang nibiyahe siya sa lugar sa miaging semana.
Sumala ni Otero nga banda alas 8 sa gabii dihang nagmaheno siya og traysikel kauban ang iyang pamilya gikan sa balay sa iyang lola sa Purok 1 sa maong barangay.
"Sakay akong pamilya, nalingaw sila og cellphone unya ako ra'y naka-focus sa dalan kay nag-drive man ko unya nagsige ko'g silbato kay nakadungog na lagi ko nga naa daw mopakita diha," asoy niini.
Nakurat na lamang si Otero dihang duol na sila overflow kay kalit niyang nakita ang usa ka naglutaw nga kolor puti nga sinina ug di niya maklaro kung unsa kini mao nga gipaspasan niya og silbato.
"Mga less than 100 meters to, di nako mailhan kung tawo o dili mao to nag-ampo na lang ko ilabi na pagtungod nako sa lugar, wala gyud bisan usa ka tawo," sulti niini.
Giangkon niya nga nanlimbawot gyud ang ilang balahibo dihang kalit nahanaw ang nakaputi pagtungod sa overflow ug dinhi na siya nipasutoy pagpadagan sa iyang traysikel.
"First time gyud nako nga kasinatian kay dugay nako wala nagbiyahe og gabii," dason ni Otero. (Orlando B. Dinoy)