Dugay na nga gidebatihan kon kinsa ang labing maayong magduduwa sa kasaysayan sa National Basketball Association (NBA).
Apan ang Hall of Fame center nga si Shaquille O’Neal adunay gibuhiang pangutana sa iyang Instagram account nga mas lisod debatihon alang sa netizens.
Si O’Neal, kinsa usa na ka TV host, nangutana kon kinsang puwersa ang modaog sa usa ka best-of-seven series kon mag-uban sila si anhing Kobe Bryant, Kevin Durant ug Stephen Curry batok sa tapok nila ni Lebron James , Michael Jordan ug Kyrie Irving.
Usa lang kini ka imahinasyon ni O’Neal gumikan kay naa sa managlahing henerasyon ang gipanghisgutan niyang superstar.
Si Jordan miduwa niadtong dekada 80s ug 90, si Bryant nagsugod niadtong 1996 ug niretiro niadtong 2016, samtang aktibo pa gihapon sila si James, Curry, Durant ug Irving.
Sa kasamtangan, si James anaa na LA Lakers, si Curry sa Golden States Warriors samtang sila si Durant ug Irving anaa sa Brooklyn Nets.
Si Jordan, kinsa migiya sa Chicago Bulls sa unom ka kampiyonato nga gibuak sa duha ka mga Three-peat, maoy gikonsiderar sa kadaghanan nga mao ang greatest of all time (GOAT) apan aduna sab uban nga mipili nila ni Bryant, James ug uban pa.
“I really cant answer this one so I’m asking you, who you got in a best of seven series,” caption ni O’neal sa iyang post.
Ang Team A, nga gilangkuban nila ni Bryant, Curry ug Durant, adunay 10 ka mga titulo sa kinatibuk-an samtang ang Team B nila ni Jordan, LeBron ug Irving adunay 11.
Sa pangutana ni O’Neal, saksak sinagol ang tubag sa netizens.
Usa sa nikomentaryo mao si two-time World Boxing Council (WBC) middleweight champion Anthony Dirrell.
“I’m going with B, was hard (decision but) they’ll win.“
Ang musikero nga si CookupBoss lahi pud ang pananaw-aw. Matod niya magdilaab ang outside shooting sa grupo ni Bryant kay anaa man ang usa sa labing kuyaw nga three-point shooter sa kasaysayan sa NBA nga si Curry. / RSC