Giunsa pagpakabuhi sa mga PUJ driver; proseso pagpabalik kanila sa karsada gisugdan

GIANTUSAN: Bisan kadaghanan kanila namarog samtang nanaghuwat sa ilang tagsa ka turno sa pagpahimus sa pagsugod na og rehistro sa Cebu City Hall sa mga PUJ driver nga tugtang makabalik sa pagpamasahero sa kadalanan sa Dakbayan sa Sugbo. / AMPER CAMPAÑA
GIANTUSAN: Bisan kadaghanan kanila namarog samtang nanaghuwat sa ilang tagsa ka turno sa pagpahimus sa pagsugod na og rehistro sa Cebu City Hall sa mga PUJ driver nga tugtang makabalik sa pagpamasahero sa kadalanan sa Dakbayan sa Sugbo. / AMPER CAMPAÑA

Ang pagpamasura gihimong panginabuhi sa duha ka managsilingan nga public utility jeepney (PUJ) driver para aduna silay mapakaon sa ilang pamilya atol sa quarantine sa Dakbayan sa Sugbo.

Kay walay biyahe ang mga tradisyonal nga PUJ sukad gipatuman ang quarantine tungod sa coronavirus disease (Covid-19) ug dili paigo ang ayuda nga ilang nadawat sa City Hall, ang manag-amigo nga Armando Capote ug Mario

Bontilao, nagpuyo sa C. Padilla habig sa Barangay Duljo Fatima, nalipay sa pagbalik sa PUJ dinhi sa siyudad.

“Munas ginhawa og pangita para palit og pagkaon. Mamasura nalang mi para makakaon among pamilya diha sa Pasil area. Ug pasalamat mi sa mayor nga iya nang pabiyahion kay mao ra gyud nay among gisaligan,” paghulagway ni Capote nga adunay unom ka mga anak.

Gawas nga mamasura, daw nahurot og prenda ni Bontilato ug nabaligya ang iyang napundar nga gagmay nga mga butang para aduna siyay ikapakaon sa iyang tulo ka anak ug tulo ka mga apo.

“Ang akong ginagmay nga butang gi-prenda. Apan sagad gibaligya para ibuhi sa akong mga anak ug apo. Pasalamat ko sa Ginuo nga bisan naa sa kalisod, buhi ug way sakit,” padayag ni Bontilao, kinsa 20 na ka tuig na nagmaneho.

Lahi sab ang kasinatian ni Hilario Pino kay sa pito ka buwan, magtabangtabang siya sa iyang amo sa shop para iyang mabuhi ang iyang asawa ug tulo ka buok anak. Siya nag-drive sulod na sa 30 ka tuig.

GISUGDAN NA

Ang Cebu City Government misugod na og proseso para mahingpit ang pagbalik sa tradisyonal nga mga PUJ human nitugot ang Land Transportation Franchising and Regulatory Board (LTFRB) 7 nga makabalik na sila og pamasahero.

Ang mga driver gipangayoan na sa ilang driver’s license ug ubang mga importanteng kasayoran para makuha ang ilang ID ug mapaubos sila Covid-19 test sunod semana.

Ang Task Force Jeepney nga giumol ni Mayor Edgardo Labella nagtinguha nga makapadagan og 1,720 ka mga PUJ, posible sunod semana, human sa Kalag Kalag.

Kana depende sa kapaspas sa pagproseso sa mga gikinahanglan ug pagsusi sa road worthiness sa mga tradisyonal nga PUJ. / PAC

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph