Walay katumanan kadtong giproponer sa SM nga bag-ohon ngadto sa supermarket ang Carbon Public Market pagpatigbabaw sa urbanized city. Nakasugat og pagsupak sa liboan ka vendors sakop sa Cebu Market Vendors Multi-Purpose Cooperative (Cemvedco) ug Allied Energetic Vendors Inc. (Alvai) nga maoy giila ug giabagan sa Cooperative Development Authority (CDA). Gipugngan sa kabalaka nga moladlad sa ilang tinda ang SM.
Apan sa kasamtangang administrasyon ni Mayor Edgar Labella kusganong nagtinguha sa pag-modernize sa Carbon Market nga makapahamugaway sa mga vendors ug presentabli haom sa kabaghoan.
Ang Megawide Construction Corporation nga nagbasi sa Manila miduso og unsolicited proposal apan magtandog sa Freedom Park nga bililhong kabilin.
Samtang, ang chairman sa CFI Community Cooperative nga si Atty. Winston Garcia miawhag sa kagamhanan sa siyudad sa Sugbo nga mahatagan og makiangayong kahigayonan nga maoy mopalambo sa Carbon Market nga makabinipisyo ang mga Sugboanon pinasikad sa build-operate-transfer scheme. Mitambayayong sa CFI ang Cavite Ideal International Construction and Development Corporation sa gahin nga 3.5B pesos ubos sa profit sharing mechanism ngadto sa city government. Duna nay pundo gikan sa Land Bank ang maong multi-billion project.
Nakasinati og kasagmuyo ang CFI pagpresentar og comparable proposal kay ang city administrator nga si Atty. Floro Casas wala mohatag og detalyadong kopya sa Joint Venture Agreement sa unsolicited proposal sa Megawide. Si Casas maoy chairman sa Joint Venture Selection Committee. Midumili sa pagtugyan sa kopya human ang CFI mibayad og 50,000 pesos nga maoy gikinahanglang rekisito. Nasabtan sa CFI nga mipabor si Casas sa Megawide.
Mireklamo sab ang CFI nga gitagalan lamang og 10 ka adlaw pag-challenge sa maong unsolicited proposal. Hinoon malaomon si Atty. Garcia nga mahatagan ra og fair chance human makapadangat ang CFI sa letter of intent ug presentasyon sa konseho sa siyudad sa Sugbo sa sesyon sa Okt. 21, 2020.
Sa pagsulat ning lindog si Atty. Garcia mihulga nga mosang-at og kasong estafa batok ni Casas. Sa iyang bahin si Mayor Labella dili mohikaw pagtunol sa CFI sa unsolicited proposal sa Megawide kon moabot sa iyang lamisa.
Ang Carbon Market maoy labing karaan ug halapad nga merkado nga nahimutang sa MC Briones ug Calderon nga maoy kasing-kasing sa dakbayan sa Sugbo. Ginganlan og Carbon kay pondohanan kaniadto og Carbon nga isugnod sa makina para korente.
(csa_1156@yahoo.com / 09064648954)