Sa dakong krus maoy akong naandan nga dagkotanan agi og paghandom sa kalag sa mga minahal sa kinabuhi nga tua na sa laing kalibutan nga gilubong sa mga sam-ang nga dili na nako mabisitaan.
Karon ubos sa gitawag nga new normal asa na man ta managkot nga gidid-an naman ta nga makabisita sa mga sam-ang sa petsa nga maoy naandan sama karong adlawa?
Tinuod wala magpili og lugar, ma menteryo man o sa balay ang pagpahinungod og mga dinagkutang kandila ang mga nangamatay natong sakop sa pamilya, kaparentihan ug kahigalaan. Pero lahi gyud kong sa ilang lubnganan i-ugbok ang gidagkotan nga kandila di ba? Kinsa man ta nga mosupak sa mga executive order nga giluwatan nga nagdili kanato nga makasud-ong sa nitso sa atong mga minahal karong adlawa ug ugma.
Motuman ta sa mga lagda paglikay sa problema. Apan wala ni magpasabot nga gikalimtan na nato ang mga kalag sa mga nangamatay.
Ang uban sama nako ug sa akong kabanay sa nangaging semana nakapanagkot na. Kadtong wala pa naay daghang paagi unsaon sila paghandum.
Pulong pa sa usa ka manabtan, mahimo ra kaayo ni nga buhaton sa atong balay. Ang mga pag-ampo ug pagdagkot og kandila mahimong buhaton diha sa atong altar apil na ang paghalad og mga bulak. Mahimo sab sa simbahan.
Wala say makapugong nato nga maghikay nga maoy naandan labi na sa probinsiya. Ang binas-oy nga putahi mahimo ra man gud gihapon nga andamon dili ba?
Ang importante nga tumanon lang gyud ang mga protocol sama sa pagsul-ob og face mask, social distancing ug ang pagpanghunaw kanunay.
Sigurado ko nga naa pa gihapoy daghan diha sa probinsiya ang may dakong preparasyon para karon ug ugmang adlawa. Magsugwak ang mga bisita. Gawas sa lamian nga putahe magbaha sab ang ilimnong makahubog.
Akong tambag ayaw palabi kay basin maalarma ang kapulisan nga gitahasan pagdakop niadtong makalapas sa mga executive order nga gipatuman.
Sa mga nauwahi og biyahe padung sa probinsiya gipahibalo sa management sa duha ka terminal nga para South ug North may biyahe gihapon.