Seguro, unang higayon sa kasaysayan sa tradisyon sa Kalagkalag o All Saints ug All Souls Day matag Nobiyembre 1 ug 2 sa tuig nga nabalda tungod sa kabalaka sa pagkaylap sa coronavirus disease 2019 (Covid-19). Unsay inyong gibati? Lahi apan wala kitay mahimo gawas sa pagsanong sa nasudnong kamandoan.
Karong adlawa, Oktubre 31, bespiras sa Kalagkalag, alegre na ang mga sam-ang o menteryo sa kadaghan sa managlutay ug daghang ang magpuwaw. Buhi kaayo ang mga ginagmayng negosyo sa palibot sama sa mga tindahan, buwak, kandila, pintor ug bisan ang mga ilimnong makahubog.
Sukwahi sa naandan, nagmika karon ang palibot sa sama sa namatay ang tradisyon? Daghang awtoridad nga nagbantay aron pagpugong sa pagbul-og sa mga tawo sa ilang pagpatuman sa health protocol.
Sukad niadtong Miyerkules, Oktubre 28, ug ngadto sa Nobiyembre 4, suspendido ang pagbisita sa mga sam-ang tibuok nasod. Bugtong mga pari, sakristan ug lay minister ang makasud aron paghimo og seremonyas.
Samtang, ang Kalagkalag dili lang relihiyusong tradisyon apan nahimong nang sosyal nga kalihokan. Tungod sa bakasyon o way trabaho, daghang manuroy sa layong dapit. Nahimong reunion sa pamilya o mga manahigala.
Nasayod kita nga temporaryo lang kini. Ang atong pagtamod sa mando makaminos sa atong pag-antos sa pandemiya sa Covid-19. Dinhi sa atong nasod, wala kitay bisan usa nga mabasol human biktima kitang tanan.
Para sa mga Katoliko nga nagtuo nga dunay kalag, dili nato bation nga gihikawan o masagmuyo human mas nakasabot seguro ang mga espiritu sa mga mimahal nato sa kinabuhi nga mitaliwan na. Dili nato kabubut-on ang pagpalta sa bisita sa dapit nga ilang kapahuwayan sa dayon.
Ang Covid-19 nakaapekto gyud sa tradisyon.