Bicol Region ang rumbo sa bagyong Rolly nga nagkakusog samtang nagkaduol sa Pilipinas.
Gikan sa hapon sa Biyernes, Oktubre 30, hangtod sa buntag sa Sabado, Oktubre 31, ang bagyo nag-irog sa kasadpang-habagatan, apan gibana-bana sa Philippine Atmospheric Geophysical Astronomical Services Administration (PAGASA) nga morumbo kini sa Bicol Region dayon ngadto sa kabaybayunan sa Aurora-Quezon Area nga magdala hangin nga 175-195 kilometro matag takna.
Tungod niini, ang Central Visayas, apil na ang Sugbo, makasinati na og hinay ngadto sa pagbunok sa uwan sugod sa Oktubre 31 sa buntag.
Paglabay sa 36 oras human sa pag-isa sa signal number 1, gipaabot nga masinati ang kusog nga hangin ug pagpanagko sa mga bawod sa kadagatan.
Gipaabot usab nga magkakusog ang bagyo samtang magkaduol sa yuta.
Dili man tuod direktang moigo sa Central Visayas ang bagyong Rolly karong Domingo apan sigun sa Pagasa aduna kini epekto sa mga lugar sa kabisayaan lakip na ang isla sa Sugbo tungod sa kadako sa ulan nga dala niini.
Tungod sa maong kasayuran ang kapulisan sa siyudad sa Sugbo nangandam na uban ang City Disaster Risk Reduction and Management Office (CDRRMO) aron malikayan ang kadaot nga gidala sa maong kusog nga bagyo.
Matod ni Police Colonel Josefino Ligan, hepe sa Cebu City Police Office (CCPO), gipaalerto na ang onse ka police stations ug gipa-monitor na ang mga dapit nga paligro sa baha sama sa kasapaan ug pag ang dahili sa yuta.
Mohimo usab silag clearing operation uban ang kagamhanan sa siyudad sa mga residente nga duol sa sapa lakip na kadtong namuyo ilawom sa mga taytayan aron malikayan ang nahitabo sa miaging semana diin adunay mga kinabuhi nga nakalas.
Kung adunay angayan nga pabakwiton ila kining buhaton ug dili na huwaton pa nga mo bunok ang kusog nga ulan ug mosaka na ang tubig sa kasapaan.
Aduna nay nailhan ang kapulisan kung unsa nga mga dapit sa dakbayan ang angayan nga bantayan panahon sa ting uwan nga maoy gipa monitor karon kini sama sa Guadalupe river ug mga sapa nga miapaw atol sa pag kusog sa uwan sa miaging semana./REV, AYB