Migallen: Adiyos kanimo, higalang Rico

KILOM-KILOM na sa adlawng Martes sa dihang akong nasayran ang usa makapakurat nga hitabo nga sama sa uban wala nako damha.

Daw og sa nawagtang ang akong kakapoy nga gikan sa hataas nga biyahe human nako masayri ang kalit nga pagtaliwan sa suod nga higala ug kauban sa buhat nga si Enrico Navarro, ang inila ug respetadong sports personality sa Sugbo.

Wa dayon ko makatuo sa dihang una nakong nabasahan sa social media ang gi-post sa lain natong higala ug kauban sa buhat nga si Calvin Cordova.

Akong gisuhid og maayo sa ubang mga na post kon unsa gyud ka tinuod ang hitabo. Dali usab dayon kaayong mikatap ang mga pahasubo, apan sa samang higayon, wa nako kalikayi ang pagsantop ug paghandom sa mga panahon nga siya ania pa ning madanglog nga kalibutan.

Ang ataki sa puso maoy mikutlo sa iyang kinabuhi. Hapon kadto sa niaging Martes samtang luwan siya sa iyang biseklita.

“Twice a week gyud na si Dad mag-bike, especially pag-lockdown na. Ganahan gyud na siya nga siya ra usa kay siya ra magbuot sa iyang rota ba,” saysay sa kamaguwang anak ni Rico nga si Popoy sa dihang atong gikahinabi, pipila ka oras sa wala pa gihatod ang patayng lawas ni Rico sa hingpit niyang pahuwayan.

Nagtuo si Popoy nga ang pag-ataki sa kasingkasing nahitabo sa dihang mipahuway sa kakapoy ang iyang amahan.

“Wala siyay pangus, wala say garas ang biseklita. Duna ray nakakita niya nga diha na siya sa ground, nalup-og,” dugang ni Popoy.

Sa kalit nga pagtaliwan ni Rico, nahasubo ang tibuok komunidad sa local sports. Daghan pa kaayo unta siyang mahimo ug matabangan.

“Ang advocacy gyud ni Daddy kana gyung grassroots development. Ever since before pa. ganahan gyud siya mo develop og talent sa mga bata. Without him, will find ways nga matuman ug ipadayon gyud ang iyang damgo ug advocacy. Magsabot pa mi ni Mama,” ni Popoy pa.

Tungod sa iyang dedikasyon ug passion sa sports, ilabi na sa paghatag og atensiyon sa mga kabatan-onan nga magiyahan sa ilang tagsatagsa ka mga hilig, si Bai Rico nakakuha usab og atensiyon sa mga sports officials didto sa Kaulohan.

Gitudlo siyang Regional Director sa Samahang Ng Basketbol sa Pilipinas (SBP) dinhi sa Central Visayas.

Ligdong nga pagkatawo, responsabli ug adunay igong baruganan apan maabi-abihon ilabi na sa mga kabatan-onan.

Kini maoy pipila lang sa mga rason kon nganong si Rico nakahupot og daghang mga position sa mga nagkalainlaing sports association dinhi sa Sugbo ug sa ubang dapit sa Kabisay-an. Daghan ang gustong makabaton sa iyang serbisyo ug dedikasyon.

Gawas sa mga nahisgutan sa unahan, nahimo usab siyang popular nga boxing ring announcer sulod sa hataas nga katuigan.

Pipila ka higayon nga amo siyang ikakuyog sa mga coverage ilabi na sa boxing ngadto sa laing dapit. Sa matag higayon nga kami magkauban sa usa kuwarto, ang sports maoy nag-unang topic nga among sawsawan.

Binayloay og hisgut sa mga eksperiyensiya ug didto daghan kog nakuha nga mga pagtulon-an gikan kaniya.

Alang kanako ang ngalan ni Rico nahimo nang usa ka kasugiran sa natad sa paugnat sa kusog dinhi sa Sugbo, gikan sa basketball, boxing, volleyball, football ug uban pa. Rico is already a legend in Cebu Sports.

“Ladies and gentlemen, here we go.” Mao kini iyang paboritong linyada sa matag higayon nga siya maoy mahimong ring announcer.

“Duwa lang ta Bai.” Mao usab kini permi niyang ipahimangno ngadto sa mga atleta labi na sa basketball ug football.

Sa pagtaliwan ni Rico, dili na man tuod kini nato madungog pa, apan ang anino sa iyang legasiya magpabiling handurawan hangtod sa kahangturan.

Adiyos kanimo, Bai Rico. Padayon sa imong malinawong pagpanaw. We’ll surely miss you, but you’ll be remembered forever.

* * *

Sa niaging semana, daw og sa nagpanikad na ang mga sabongero sa Grand Tejero cocpit arena nga makabalik na sa ilang operation.

Gipakita sa atong higala nga si Nonoy Chiongbian, tag-iya sa Tejero Grand, kon unsa ka preparado sila sa pagsunod sa mga lagda nga gilusad sa Inter-Agency Task Force (IATF) ug sa Department of the Interior and Local Government (DILG).

Sa dili madugay, moarangkada na unya ang sabong sa Tejero ug gamayng panahon lang ang paabuton aron hingpit na nga mahibalik ang operation sa sabong.

Ang Gallera de Mandaue, sa ilang bahin, mipadayag na usab sa ilang kaandam.

Gipaabot pa usab nila ang mga bag-ong guidelines ug ipahibawo lang unya nila ang sunod nilang buhaton.

Sa ilang Facebook page, mao kini ang ilang giluwatan nga pamahayag.

Sa pagsunod sa pinaka bag ong guidelines nga gipagawas sa DILG, mga Gamefowl breeders/fighters (maximum 5 ka tao per team) lang ang pwede makasulod sa buwangan. Daghan mang panginabuhi ang maapektuhan karon pero mas hatagan natog importansya ang atong health and safety.

Kami mo pahibalo puhon atol sa pagpagawas ug mas luag nga lagda matod sa COVID aron mas daghan natong kahigsuonan ang maka sulod na. Ang kahimsug ug kaluwasan natong tanan ang una natong prioridad sa karon. Salamat sa pagsabot - TEAM UCCC. (jun.migallen22@gmail.com)