LAIN na usab nga tawo nga nagbiseklita naligsan sa bus nga iya sa Ceres.
Alas 6:30 sa buntag sa Sabado, Oktubre 31, 2020 sa may national highway sa Barangay Pitogo, lungsod sa Consolacion.
Namatay diha-diha si Donato Rosales, 58, minyo, taga Purok 4, Brgy. Pitogo, Consolacion tungod sa grabeng kadaut sa iyang ulo nga nalatayan sa bus.
Si Rosales job order nga kawani sa lungsod nga nadestino sa merkado publiko isip utility.
Gibalhog sa detention cell sa Consolacion Police Station si Danny Boy Responte, taga Villamonte, Bacolod City, Negros Occidental, driver sa Ceres Bus (ABL-3257).
Si Police Corporal Cresenciano Saladaga, Jr. imbestigador sa Traffic Police sa Consolacion nga nahinabi sa Superbalita Cebu, nagkanayon nga naguroy og walo ka metros si Rosales dihang naigo ug napasok sa ilawom sa bus hinungdan nga naligsan.
Si Rosales padulong mopauli sa ilang balay sakay sa iyang bisiklita gikan ni-duty sa merkado.
Nialegar si Responte nga ni-overtake sa nag-unang awto si Rosales hinungdan nga nasaghiran sa bus.
“Apike naman daw kaayo ana ang driver kay pag-brake niya naguroy naman ang biktima sa ilawom,” sumala ni Saladaga.
Niadtong Biyernes sa udto, usa usab ka security guard ang naligsan sa laing Ceres bus sa Dakbayan sa Mandaue. (GPL)