ULO sa gituohang usa ka babaye nakaplagan sa mga residente duol sa Cabahug Wharf, Barangay Looc, Mandaue City, ala 1:30 sa Sabado sa hapon, Oktubre 31, 2020.
Ang dapit duol ra sa lugar diin nakit-an sa miaging semana ang usa ka kamot ug tiil sa tawo. Gituohan nga ang ulo, tiil ug kamot gikan ra sa usa ka lawas.
Apan kon gikan ba kini sa lawas nga nakaplagan niadtong Oktubre 24 sa sapa sa sityo Kalubihan, Barangay Talamban, Dakbayan sa Sugbo, maglisod pa sila pagtumbok kay wa pa gani kini ma autopsy.
Hinuon ang sapa diin nakaplagan ang lawas nagsangko sa kadagatan sa Dakbayan sa Mandaue. Ang lawas nga giputos og trapal way mga kamot, mga tiil ug ulo.
Matod ni Police Major Aldrin Villacampa, hepe sa Opao Police Station, nga nagdinaganay ang mga bata sa ilang kahadlok human makakita sa ulo sa tawo kilid sa dagat sa maong lugar.
Daling nangayo og tabang ang mga bata sa ilang silingan ug nitawag dayon sa Opao Police Station, ala 1:50 sa hapon.
Daling miresponde ang ilang tropa ug ang Scene of the Crime Operation (SOCO) personnel sa lugar.
Gituohang babaye ang nanag-iya sa maong ulo tungod kay adunay blonde ang parte sa buhok niini, matod ni Villacampa.
Dugang niya nga di na sab mailhan ang nawong sa babaye tungod kay anaa na kini sa state of decomposition kun nagkadugta na.
“Ang nawng mura nag sa munyika. Nagtupad sad gani tong ulo ug munyika,” sigon ni Villacampa.
Aduna say posibilidad nga gikan ra sa usa ka lawas ang ulo, tiill ug kamot. Sigon ni Villacampa nga aduna lay 30 ka metros ang gilay-on gikan sa ulo ug sa kamot samtang ang tiil layo layog dyutay apan buyon ra kini sa maong wharf.
Wa hinuon maneguro si Villacampa kon ang lawas nga nakit-an sa miaging semana sa sapa sa Barangay Talamban mao bay tag-iya sa maong ulo.
Padayon pa gihapon ang pag-imbestigar sa kapulisan sa maong insidente.
WA MA-AUTOPSY
Wa ma-autopsy ang lawas sa babayeng gi-chop-chop.
Matod ni Police Captain Jonathan Taneo, hepe sa Talamban Police Station, nga nahinabi sa Superbalita Cebu nga kini tungod kay wa pay tagtungod nga nipatim-aw.
“Dili pa maka-proceed sa pag-autopsy kay wala man gud tagtungod nga maoy gikinahanglan aron mahimoan og request,” sulti ni Taneo.
Dunay duha ka mga pamilya nga niduol kanila niadtong adlaw sa pagkakaplag sa lawas nga lumolupyo sa Barangay Labangon ug Pardo, apan pipila ka adlaw ang nakalabay, nahibaw-an ra sa maong pamilya nga naa ra ang ilang gipangita.
“Among i-focus karon, makig coordimate mi sa Cebu Province, labi na sa dakbayan sa Toledo ug lungsod sa Balamban kay mao man ang sumpay man gud sa sapa sa mga kabukiran sa Balamban ug Toledo,” matod ni Taneo.
Iyang giawhag ang si bisan nga kinsa kadtong dunay kabanay nga nawad-an og sakop nga babaye, susihon ang lawas alang sa posibleng pag-ila.
Dugang ni Taneo nga sa ilang nakita dunay mga samad ang lawas nga sama sa mga samad sa dinunggaban apan ang medico legal lang ang makasulti niini. Ang lawas naa sa usa ka punerarya.