KARONG adlawa ang Kalag-Kalag (All Souls Day), Nobyembre 2, 2020. Sa wala pa ang pandemya, nagpunsisok gyod ang mga tawo sa sementeryo, apan karon, sama sa ordinaryong adlaw sa mga sam-ang, nga usa ka dapit nga mingaw.
Resulta kini sa gimando sa Inter-Agency Task Force (IATF) Management of Emerging Infectious Diseases nga sirhan ang tanang sam-ang sa nasud gikan Oktubre 30 ngadto Nobyembre 4.
Usa kini sa mga tinguha nga di na madugangan pa ang ihap sa mga natakbuyan sa coronavirus disease (Covid-19), kay lagmit duna gayoy magtinakdanay sud sa mga sementeryo gumikan sa posible untang pagdasok sa mga tawo.
Sa Davao City, dunay "exemption" ang lokal nga panggamhanan, gihatagan og pagtukot kadtong maglubong, ang pagduaw kay birthday sa namatay ug ang paghandom sa ika-40 diyas sa kamatayon.
Hinuon, gikan sa duha ka adlaw nang gidili ang pag-adto sa mga sementeryo, mituo man hinuon ang mga tawo. Kay nasayod sila nga di gyod makita ang kalaban.
Hinuon, human sa mga adlaw nga gidili, puwede hinuong moadto sa mga sementeryo apan limitado ang ihap sa mga mobisita.
Ang maayong himuon nalang sud sa balay mao ang paghalad og pag-ampo sa mga mitaliwan nga mga minahal sa kinabuhi, pag-ampo ang ilang gikinahanglan, busa ampoan ta sila.