MISANGKO sa kaguliyang ang gihimong pagpanakop sa kapolisan ngadto sa dul-an 168 ka mga benepisyaryo sa Comprehensive Agrarian Reform Program (Carp) nga nagtapok didto sud sa First Consolidated Joint Ventures Inc. (kanhi Cocoa Industries Incorporated) sa Hagonoy, Davao del Sur nga giingong milapas sa minimum health proctocols sa Covid-19, Biyernes sa gabii, Oktubre 30.
Sumala pa nga gi-harass sa kapolisan nga gipadala sa Davao del Sur Police Provincial Office (DSPPO) ang mga nagtapok nga benepisyaryo nga buot mo-claim sa ilang titulo gikan sa CII.
Natawo ang kaligutgot sa mga benepisyaryo dihang igo lang sila gipapirma og dokumento nga wala sila’y kopya ilabi pa nga sagad niini mga sakop sa Lumad.
Apan, sumala pa nga sa gym sa lungsod gipamutang ang mga gipanakop ug wala nakakaon og panihapon niadtong higayona gawas nga mitaas sab ang dugo sa mga senior citizens.
Nahimong viral sa social media ang alegasyong pagpang-harass sa kapolisan human matod pa nga wa gitamod ang ilang tawhanong katungod.
Sa bahin ni Police Colonel Alberto Lupaz, director sa DSPPO, gipamugos niini nga milapas sa curfew hours ang mga benepisyaryo ug public safety concern nga mao unya ang posibleng hinungdan sa pagkatap sa Covid-19.
Apan, makita sa mikalat nga hulagway nga anaa lamang sa gymnasium nakatulog ang mga gipangsikop ug wala gani gi-isolate.
Sa 168 ka indibidwal, 115 niini ang lalaki nga aduna’y kaubang duha ka meno ug 115 ang babaye nga duna sab duha ka menor.
Paglapas sa polisiya sa Inter-agency Task Force on Covid-19 ang gihimong rason sa kapolisan sa ilang pagpanakop ug gitakdang isyohan lamang og citation tickets ang mga nadakpan una sila makauli sa ilang tagsa ka mga balay.
Kantidad P1,000 ang gitakdang multa sa matag usa ilawom sa mandatory health protocols. (Orlando B. Dinoy)