GIHANGOP sa mga opisyal ug katawhan sa Davao Occidental nga hingpit nang nahuman ang usa ka tulay sa Barangay Kitayo-Balangonan, Jose Abad Santos (JAS), Davao Occidental sanglit paspas na ilang pagbyahe padung sa silingang lungsod sa Glan, Sarangani.
Mismong si JAS Mayor Jason John Joyce ang nagkumpirma nga nahumaan na ang maong tulay ilawom sa Department of Public Works and Highways (DPWH).
Sumala ni Joyce nga sa sapa kaniadto nagaagi ang mga mobyahe padung Glan ug medyo langan ang oras tungod sa lisod nga agianan.
Apan karon, mas dali na ang pagtabok gikan sa Rehiyon Onse ngadto sa Rehiyon Dose.
“Dati, matatagalan ang kanilang paglalakbay lalo na kung masama ang panahon dahil ma-stranded sila sa border pagbumabaha ang ilog,” matod ni Joyce.
Dako sab ang pasalamat sa mga Jasensyos sa DPWH ug probinsyang kagamhanan nga nag-alayon aron paspas mahuman ang proyekto sanglit sila ang usa sa mga daling maka-benepisyo sa tulay.
Bisan ang nahuman nga national highway sa ilang lungsod giatiman sab sa national nga gobyerno mao nga gilauman ni Joyce nga molambo na ang ilang turimso ilabi pa nga daghan ang mga nindot nga kalaagan sa ilang lugar. (Orlando B. Dinoy)