DAKONG tanghaga alang sa 42-anyos nga lalaki kon nganong nagsige og padamgo kaniya ang iyang namatay nga 85-anyos nga apohan niadtong miaging tuig sukad sa miaging semana.
Gisaysay ni Romeo, ulitawo (bansagon gitago), residente sa Barangay New Clarin, Bansalan, Davao del Sur, nga klaro kaayo ang hulagway sa iyang Lola Clara nga mipanaw sa sakit sa kidney failure niadtong Oktubre 2019.
Apan, wa niya masabti kun nganong nagpunay kini og pangayo og pulbos kada mopakita sa iyang damgo.
Giangkon ni Romeo nga wa na siya makaduaw sa lubnganan sa iyang apohan gumikan sa kahadlok sa pandemya sa Covid-19.
Bisan gitugtan ang pagduaw sa mga sementeryo kutob niadtong Oktubre 28, wa gihapon makaduaw ang ulitawo gumikan kay nabalaka nga madakpan kay wa siya’y ikapalit og face shield nga usa sa gimando sa minimum health protocols.
Gibutyag niini nga bisan og edaran na ang iyang apohan niadtong buhi pa kini, di gyud kini molakaw kung dili makapangarte sa nawong sama sa pagmake-up.
Buot ni Romeo nga aduna’y tawong makatabang kaniya nga mohubad sa iyang damgo mao nga nangita siya og albularyo nga maduolan niini.
Samtang, iya na lamang dagkotan og kandila ug halaran og buwak ang nahibiling hulagway sa iyang apohan didto sa ilang balay atol sa paghandum sa adlaw sa mga minatay karong adlawa, Nobyembre 2.