NANGUNAY ang boxing trainer ni Manny Pacquiao nga si Boboy Fernandez sa pagresponde sa mga biktima sa bagyo tilawila sa kusog nga hangin ug ulan nga dala sa bagyong Rolly sa Bicol region sa Luzon.

Ang hulagway ni Fernandez nga gadala og chainsaw aron i-clear ang mga kahoy nga natumba sa ilang lugar nag-trending sa social media sa dihang gi-post kini sa opisyal nga Facebook page ni eight-division world champion Pacquiao.

Ang bagyong si Rolly midala og dakong kadaot sa Albay tungod sa kusog nga hangin ug uwan sa pag-landfall niini niadtong Dominggo.

Gidayig sa mga netizen ang gibuhat ni Fernandez nga migawas bisan pa man sa kusog nga hangin ug uwan aron mo serbisyo sa ilang lugar.

Si Fernandez mao ang bise-mayor sa Polangui, Albay.

Ingon pa ni netizen Felix Loy-odan nga di lang sa boxing ring maayo si coach Fernandez kay gipakita sad niya ang pagkamaayo sa serbisyo publiko taliwala sa mga pagsuway.

Dugang ni Yosi Castillo nga kugihan gyud kaayo sa Fernandez og maayo unta modaghan pa ang sama niya sa serbisyo publiko. Si Fernadez kababata ni Pacquiao sa General Santos City.