'Tulisan' mi-apply og trabaho, nasikop

NANGAPLAY PA: Si Edwin Ejona Banjao, 20, nadakpan sa kapulisan human ni-apply sa usa ka water refilling station sa Dakbayan sa Mandaue usa ka adlaw human makaeskapo gikan sa kapulisan nga niresponde sa ilang pagpanulis. (GIKAN SA FB PAGE NI MAYOR AHONG CHAN)
NANGAPLAY PA: Si Edwin Ejona Banjao, 20, nadakpan sa kapulisan human ni-apply sa usa ka water refilling station sa Dakbayan sa Mandaue usa ka adlaw human makaeskapo gikan sa kapulisan nga niresponde sa ilang pagpanulis. (GIKAN SA FB PAGE NI MAYOR AHONG CHAN)

NASIKOP na sa mga sakop sa Police Station 5 sa Lapu-Lapu City Police Office (LCPO) ang katapusang suspetsadong tulisan ug giingong lider sa pagpanulis ug usa ka taxi drayber sa Barangay Pusok, Dakbayan sa Lapu-Lapu niadtong Oktubre 30.

Ang suspek giila nga si Edwin Ejona Banjao, 20, garbage collector sa usa ka solid waste solution sa Sangi Road, Barangay Pajo, apan nasayran nga lumad nga taga Mabinay, Negros Oriental.

Si Banjao natultolan sa kapulisan human nangaplay og trabaho sa usa ka water refilling station sa Barangay Opao, Dakbayan sa Mandaue.

Matod ni Police Captain Aibert Jay Samson, hepe sa Police Station 5 sa LCPO nga nanawag sa ilang buhatan ang tag-iya sa refilling station human makamatikod nga may-ong ni Banjao ang hulagway sa katapusang tulisan nga ilang gipangita.

Dali kini nilang giadto sa water refilling station diin usa unta siya ka stay-in nga trabahante ug didto na nila masikop.

Si Banjao maoy gitumbok sa iyang laing tulo kaubang tulisan nga unang nadakpan nga maoy nangulo sa ilang pagtulis sa usa ka taxi driver.

Ang lain nilang kauban nakalas dihang nisukol sa kapulisan.

“After nakasibat ni sa Lapu-Lapu didto ni nagtago-tago sa ilawom sa Marcelo Fernan Bridge unya gumikan kay wala man siyay trabaho ug walay pamilya diri napugos pagpangaply og trabaho,” matod ni Samson.

Si LCPO Director Police Colonel Clarito Baja, sa iyang bahin, nihulagway nga dakong natampo sa pagsumpo sa krimen ang pagpakabana sa komunidad.

“Pasalamat ta kay tungod sa social media, daling nikatap ang iyang nawong mao dali sad siyang nadakpan,” matod ni Baja.

Si Lapu-Lapu City Mayor Junard Chan, sa iyang bahin, subling mipahimangno sa tanang badlungon sa dakbayan nga dili sila magmalampuson sa ilang dautang mga tinguha ubos sa iyang administrasyon.

“Usbon nako: Walay luna sa atong syudad ang mapahimuslanong indibidwal nga sama ninyo. Pagbag-o namo sa inyo kinabuhi kay daghan pamaagi nga makakita ug panginabuhian nga legal ug dili makatamak ug laing tawo,” matod ni Chan.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph