MOABOT na sa 16 ka mga tawo ang nangamatay sa bagyong Rolly nga nitadlas sa Bicol dala ang kusog kaayong hangin ug bunok sa uwan nga nitumba sa mga kahoy, poste, nilangkat sa mga atop sa kabalayan ug nakaingon sa pagbaha sa lahar.
Ang Office of the Civil Defense (OCD) sa Bicol region niingon sa Lunes, Nobiyembre 2, 2020 nga lima ang nangamatay sa lalawigan sa Albay, diin ang lahar gikan sa bulkang Mayon nilunop sa gatusan ka mga balay ug hayan nilubong pa sa pipila ka mga residente sa Guinobatan.
Tulo ka mga lumolupyo sa Guinobatan gikataho nga missing.
Laing nangamatay nagagikan sa Gigmoto, Virac ug San Miguel in Catanduanes.
Si National Disaster Risk Reduction and Management Council (NDRRMC) spokesperson Mark Timbal niingon nga ila pang gisusi nga pipila sa mga residente sa Guinobatan gilubong buhi sa mga bato ug lapok.
Iyang gitataw nga ang regional DRRMC nipahigayon og preemptive evacuation sa apektadong mga dapit sa wa pa moigo ang bagyo.
Matod sa NDRRMC nga dunay kinatibuk-ang 372,653 ka mga pamilya o kapin sa duha ka milyon ang apektado sa bagyo sa Luzon regions, nga mao ang Ilocos, Cagayan Valley, Central Luzon, Calabarzon (Cavite, Laguna, Batanga, Rizal ug Quezon), Mimaropa (Mindoro, Marinduque, Romblon, ug Palawan), Bicol, Cordillera Administrative Region ug National Capital Region. Sa Visayas regions, Western, Central and Eastern Visayas ug ang Zamboanga Peninsula apektado usab.
HINABANG
Ang Police Regional Office (PRO) 7 andam modawat og mga hinabang alang sa Bicol Region nga ilang ipadala sa 100 ka mga pulis gikan sa Crisis Response Battalion (CRB).
Ang pagpadala maoy kamandoan ni PNP Chief Police General Camilo Cascolan aron sila patabangon sa relief, search and rescue operation.
Matod ni Police Brigadier General Albert Ignatius Ferro, direktor sa PRO 7, nga magdala usab og mga pagkaon, tubig ug uban pa nga panginahanlan sa mga lumolupyo sa albay ug mga silingang probinsya nga apektado sa bagyong Rolly.
“I’m preparing now a 100-man team para motabang didto sa Bicol. So, ako lang gi-prepare naay mga gamit gamit, equipment para sa possible nga retrieval or search and rescue sa atong mga kaigsuonan didto sa Bicol. I’m still gathering food stuff, some drinking water and other necessity that we could help our community in region 5,” matod ni Ferro.
Ang mao nga mga pulis gibansay sa ilang unang tahas.
“Sa mga kaigsuonan sa Central Visayas if you have extra clothes and blankets, please feel free to give that to PRO-7 headquarters in Camp Sergio Osmeña. Because what, they need now is water, mga sinina ug mga blankets because most of their houses in Guinubatan (Albay) were buried, including kitchen utensils,” dugang ni Ferro. (SunStar Philippines, AYB)